Արցախի Դրմբոն գյուղի բնակիչները Մարտակերտի շրջանից դեպի Վարդենիս ճանապարհը շահագործելու հարցով դիմել են ռուս խաղաղապահներին (տեսանյութ)

21:08 • 18.01.21

Արցախի Դրմբոն գյուղի բնակիչները Մարտակերտի շրջանից դեպի Վարդենիս ճանապարհի շահագործման հնարավորություն ունենալու հարցով դիմել են ռուս խաղաղապահներին:

«Վարդենիս տանող ճանապարհն անհասանելի է մեզ համար, մինչդեռ ադրբեջանցիները բեռնատարներով երթևեկում են և բեռներ են տեղափոխում Քարվաճառ: Մեր խաղաղ ակցիայի նպատակը ձեր ուշադրությունն այս հարցին հրավիրելն է, որպեսզի դուք պայմաններ ապահովեք այս ճանապարհով անվտանգ կերպով Վարդենիս հասնելու համար»,- ասել է ակցիայի մասնակիցներից մեկը, որը խաղաղպահ ուժերի ներկայացուցչին խնդրել է հարցը փոխանցել ռուսական խաղաղապահ առաքելության հրամանատար, գեներալ-լեյտենանտ Ռուստամ Մուրադովին:

Ակցիայի մասնակիցներից մեկը շեշտել է, որ չեն կարողանում օգտվել Վարդենիս տանող ճանապարհից, ինչի պատճառով հարազատներին այցելելու համար 60 կմ-ի փոխարեն ստիպված են լինում 500 կմ տարածություն անցնել:

Ռուս զինվորականն, իր հերթին, նշել է, որ իրենց առաքելությունը խաղաղ է և կոչված է աջակցելու երկու ժողովուրդների միջև երկխոսությանն ու համակեցությանը: 

«Այդ հարցն առավել բարձր մակարդակում է որոշվում: Ես կանեմ ամեն ինչ, որ այդ խնդիրը լուծվի»,- ասել է ռուս զինվորականը՝ հավելելով, որ իրենց նպատակը նախևառաջ հրադադարի ռեժիմը պահպանելն է:

Բնակիչների կողմից գրավոր խնդրանք է փոխանցվել ռուս խաղաղապահ ուժերի հրամանատար Ռուստամ Մուրադովին: