Հունիսին կներկայացվի Apple Music-ի խոշորագույն թարմացումը, որը, սակայն, հասանելի չի լինի AirPods-ի համար

Ամերիկյան Apple ընկերությունը հայտարարել է Apple Music ծառայության խոշորագույն թարմացման մասին:

Այս մասին տեղեկանում ենք ընկերության պաշտոնական կայքում տեղադրված հաղորդագրությունից: 

Հիմնական նորամուծությունը կլինի առանց որակի նվազման Lossless Audio (ALAC) ձևաչափով երաժշտություն լսելու հնարավորությունը: Ի սկզբանե, այս գործառույթը կտարածվի Apple Music-ի 20 միլիոն, իսկ տարեվերջին այն կտարածվի տվյալների բազայում առկա մնացած բոլոր 75 միլիոն երգերի վրա:

Միևնույն ժամանակ, Apple-ը հաստատել է, որ AirPods-ը, այդ թվում՝ դրա Pro և Max տարբերակները, «չեն կարողանա օգտվել այս գործառույթից»՝ անլար կապի տեխնիկական հատկությունների պատճառով:

Ակնկալվում է, որ Apple Music-ի նոր տարբեկարկը կներկայացվի հունիսին: Նոր ծառայությունից օգտվելու համար ներկայիս ամսական վճարը չի փոփոխվի:

Հիշեցնենք՝ ALAC ձևաչափը հնարավորություն է տալիս պահպանել նախնական ձայնային ֆայլի յուրաքանչյուր բիթը: Lossless audio (առանց կորստի աուդիո) նշանակում է, որ Apple Music-ի բաժանորդները կկարողանան լսել ճիշտ նույն երաժշտությունը, ինչն արտիստները ստեղծել են ստուդիայում: Այսինքն, մինչ օգտատերերին հասնելն աուդիոյի որակի անկում ընդհանրապես չի նկատվի;