Մուլտիվիտամինների ամենօրյա ընդունումը նվազեցնում է քաղցկեղի հավանականությունը

Հարվարդի բժշկական դպրոցի գիտնականները հետազոտության արդյունքում եզրակացրել են, որ մուլտիվիտամինների ամենօրյա ընդունումը նվազեցնում քաղցկեղի առաջացումը տարեց տղամարդկանց մոտ։

Գիտնականներն ուսումնասիրել են 15 հազար միջին և բարձր տարիքի տղամարդկանց 11 տարի շարունակ հաղորդում է WebMD-ը:

Ընդհանուր առմամբ մուլտիվիտամինները նվազեցրել են բոլոր տեսակի քաղցկեղի ռիսկը 8%-ով:

Ուսումնասիրության շրջանակներում տղամարդիկ ընդունել են Centrum Silver մուլտիվիտամինները: Եղել է նաև վերահսկողության խումբ, որին տրվել է պլացեբո:

Հետազոտման սկզբում կամավորները նվազագույնը 50 տարեկան են եղել։ Նրանցից 1312-ի մոտ ինչ-որ ժամանակ քաղցկեղ է հայտնաբերված եղել:

Վիտամիններ ընդունած խմբում 1290 քաղցկեղի դեպք է գրանցվել, իսկ պլացեբոյի խմբում` 1379 դեպք: Մոտ 50% դեպքերում շագանակագեղձի քաղցկեղ է ախտորոշվել:

Ինքնին շագանակագեղձի քաղցկեղի վրա վիտամինները չեն ազդել, սակայն ազդեցություն են գործել քաղցկեղի ընդհանուր վիճակագրության վրա:

Պարզվել է, որ վիտամինները այլ տեսակի քաղցկեղի վտանգը նվազեցրել են 12%-ով։ Իսկ թե ինչպես են մուլտիվիտամինները ազդում կանանց կամ ավելի երիտասարդ տարիքի անձանց վրա, մասնագետները չեն նշում: