Բրիտանական դատարանը Apple-ից պահանջել է փոխհատուցել Samsung-ի դատական ծախսերը

Մեծ Բրիտանիայի դատարանը Apple ընկերությունից պահանջել է վճարել մրցակից Samsung Electronics ընկերության դատական ծախսերը։ Դատարանի որոշման համար հիմք է հանդիսացել այն, որ Apple ընկերությունը խոստովանել է, թե iPad-ի դիզայնը կրկնօրինակելու հարցում Samsung-ը մեղավոր չի եղել։

Ինչպես տեղեկացնում է «ՌԻԱ Նովոստի» գործակալությունը, դատարանը պահանջել էր պարզաբանմամբ հանդես գալ, ինչն ընկերությունն արել էր, սակայն դրա տեքստը Samsung-ին չէր բավարարել։ Հերքման տեքստում Apple-ը հղում էր կատարել այլ երկրների դատարաններին, որոնք այլ որոշում էին կայացրել։

Samsung-ը հայտարարել էր, որ Apple-ի հաղորդագրությունը՝ Գերմանիայի և ԱՄՆ-ի դատարանների հղմամբ, հստակ չէ և շփոթեցնող է։ Բրիտանական դատարանը համաձայնվել էր և պահանջել 48 ժամվա ընթացքում նոր պարզաբանում հրապարակել։

Տեքստային փոփոխություններից բացի, բրիտանական դատարանը պահանջել էր Apple-ից այն տեղադրել ավելի երևացող տեղում՝ կայքի գլխավոր էջում։

Չնայած այդ փոփոխությունները տեղի էին ունեցել, Բրիտանական դատարանն այժմ էլ  պահանջել է փոխհատուցել Samsung-ի դատական ծախսերը.գումարի չափը դեռևս ճշտված չէ։

Դատարանի որոշմամբ, պարզաբանումը Apple-ի կայքում պետք է մնա 6 ամիս, բացի այդ, ընկերությունը պարտավորվել է նաև լրատվամիջոցներով տարածել այն։ Apple-ի ներկայացուցիչները դեռևս դատարանի որոշումը չեն մեկնաբանել։