Վրաստանում քննարկվել են Բաքու-Թբիլիսի-Կարս երկաթգծին առնչվող հարցեր

18:28 • 08.01.14

Վրաստանի էկոնոմիկայի նախարարությունում այսօր աշխատանքային հանդիպում է տեղի ունեցել՝ նվիրված Բաքու-Թբիլիսի-Կարս երկաթգծի նախագծին։

 

Ինչպես տեղեկացնում է Trend գործակալությունը, հանդիպումն անցել է երկրի փոխվարչապետ, էկոնոմիկայի նախարար Գիորգի Կվիրիկաշվիլու գլխավորությամբ, և այդ ընթացքում ներկայացվել է 2013թ.-ին երկաթգծի կառուցման ընթացքի մասին հաշվետվությունը և քննարկվել այն քայլերը, որոնք նախատեսվում է իրականացնել ընթացիկ տարում։

 

Բաքու-Թբիլիսի-Կարս երկաթուղային նախագիծը նախատեսում է Մարաբդա-Կարցախի 153 կիլոմետրանոց հատվածի վերակառուցում և 27 կիլոմետրանոց հատվածի շինարարություն, որն Ախալքալաքից հասնելու է Թուրքիայի սահման։


Աշխատանքները տարվում են 4 փուլով։


Առաջիկայում նախատեսված է վրաց-ադրբեջանական երկկողմ հերթական նիստը, որի ընթացքում քննարկվելու են ֆինանսական և տեխնիկական հարցեր։