Վիտալի Բալասանյանի նկատմամբ իրականացված մահափորձն Արցախում արտառոց վիճակ չի ստեղծել
Լեռնային Ղարաբաղի Հանրապետության Նախագահի նախկին թեկնածու Վիտալի Բալասանյանի նկատմամբ իրականցված մահափորձն, ըստ ԼՂՀ Նախագահ Բակո Սահակյանի մամլո խոսնակ Դավիթ Բաբայանի, որևէ արտառոց վիճակ կամ շիկացած մթնոլորտ չի առաջացրել Արցախում:
«Մարդիկ ապրում են հետտոնական մթնոլորտում, իրենց առօրյայով են զբաղված»,-ասաց Դավիթ Բաբայանը՝ ավելացնելով, որ այդ մահափորձի հետ կապված որևէ իրադարձություն կամ միջադեպ չի եղել:
«Կա´ն մարդիկ, ովքեր փորձում են ամեն ինչ անել, որպեսզի ինչ-որ բան լինի, բայց այդ փորձերն ապարդյուն են անցնում»,-ընդգծեց ԼՂՀ Նախագահի մամլո խոսնակը:
Նրա խոսքով՝ գործն ընթանում է թափանցիկ և բարձր պրոֆեսիոնալ մակարդակով:
«Կարծում եմ՝ շուտով արդեն ամեն ինչ պարզ կլինի, որովհետև դեռ վաղաժամ է խոսել վերջնական արդյունքի մասին, քանի որ գործը գտնվում է իրավապահ մարմինների վարույթում, հետո կգնա դատարան»,-ասաց Դավիթ Բաբայանը՝ հավելելով, որ որևէ բողոք որևէ մեկի կողմից չկա, այդ թվում նաև՝Վիտալի Բալասանյանի կողմից:
Իսկ ԼՂՀ ԱԺ նախկին պատգամավոր, «Անալիտիկոն» հանդեսի գլխավոր խմբագիր Գեղամ Բաղդասարյանի խոսքով՝ հանրության համար անակնկալ էր կատարվածը:
«Եղան տարբեր մեկնաբանություններ, ընդ որում՝ ժամանակից շուտ: Կարծում եմ, որ ճիշտ կլինի մինչև նախաքննության ավարտը զերծ մնալ ցանկացած մեկնաբանությունից, և կարծում եմ՝ մոտ ժամանակներս ջրերը կպարզվեն, և մենք ամեն ինչ կիմանանք»,-ասաց Գեղամ Բաղդասարյանը:
«Մի կողմից՝ ընդունելի չէ մահափորձի միանշանակ քաղաքականացումը, մյուս կողմից՝ ինձ համար միանգամայն տարօրինակ է ԼՂՀ գլխավոր դատախազության այսպես ասած՝ գերօպերատիվ արձագանքն այդ ամենին, երբ շրջանառության մեջ դրվեց կոնկրետ դրդապատճառ»,- նշեց Գեղամ Բաղդասարյանը:










