Ստավրոպոլում մեկ օրում տարբեր մեքենաների մեջ 5 դի են գտել

14:49 • 09.01.14

ՌԴ Ստավրոպոլի երկրամասում երեկ ժամը 00։30-ից 19։30-ի սահմաններում 4 մեքենաներում 5 դիակ է հայտնաբերվել։


Ինչպես տեղեկացնում է Lenta.ru-ն, պարզվել է, որ զոհերից մեկը տաքսու վարորդ է։ Նրա գործընկերները պատմել են, որ երեկոյան նա պատվերի է դուրս եկել։

 

Երկրորդ զոհը դարձյալ վարորդ է, իսկ երրորդ տղամարդը զբաղվել է կահույքագործությամբ։ Եվս երկու դի հայտնաբերվել է Մարինսկայա շրջանում։

 

Այն մեքենայի մոտ, որտեղ ընկած է եղել կահույքագործի դին, աշխատել է պայթուցիկ սարք, սակայն ոչ ոք չի տուժել։ Հետո նույն մեքենայում ևս մի ռումբ է հայտնաբերվել, որը, սակայն, հաջողվել է վնասազերծել։

 

Սպանությունների դրդապատճառների վերաբերյալ ենթադրություններ չկան: Բոլոր սպանությունները քննվում են մեկ քրեական գործի ներքո։

 

Ստավրոպոլի երկրամասում պատրաստվել է 5 տղամարդկանց սպանած կասկածյալի ֆոտոռոբոտը։