Ուկրաինայի խորհրդարանն ընդունել է ցուցարարների համաներման մասին օրենքը. ընդդիմությունը հրաժարվել է կատարել համաներման պայմանները

09:11 • 30.01.14

Ուկրաինայում Ռադան տևական բանավեճերից հետո ընդունել է օրենք, որով համաներում է սահմանվում բողոքի ակցիաների մասնակիցների համար, հայտնում է ռուսական Առաջին ալիքի լրատվականը:

 

Սակայն ընդդիմությունը մտադիր չէ կատարել Գերագույն ռադայի ընդունած համաներման մասին օրենքի պայմանները և ազատել գրաված վարչական շենքերը: Այդ մասին հայտարարել է Անկախության մայդանի ճամբարի պարետ Անդրեյ Պարուբիյը, գրում է lenta.ru-ն՝ հղում անելով УНН-ին: Մայդանի պաշտպանությունը, նրա խոսքով, կուժեղացվի, որպեսզի չկարողանան ցրել այնտեղ հավաքված ցուցարարներին:

 

Այն, որ ընդդիմությունը համաձայն չէ կատարել համաներման մասին օրենքի պայմանները, հայտնել է նաև ընդդիմադիր «Սվոբոդա» կուսակցության առաջնորդ Օլեգ Տյագնիբոկը՝ ելույթ ունենալով Անկախության մայդանում հավաքվածների առջև:

 

Համաներման մասին օրենքի նախագիծը, որը նախատեսում է բողոքի ակցիաների մասնակիցների պատասխանատվությունից ազատում, բացի խիստ ծանր հանցագործություն իրականացրածներից, Ուկրաինայի Գերագույն ռադան ընդունել է հունվարի 29-ի ուշ երեկոյան: 416 պատգամավորից օրենքին կողմ է քվեարկել 232-ը, դեմ՝ 11 հոգի:

 

Փաստաթղթի համաձայն՝ համաներումը կիրականացվի միայն այն պայմանով, եթե ցուցարարներն ամենաուշը 15 օրից ազատեն իրենց գրաված վարչական շենքերը և արգելափակումից հանեն տրանսպորտային կապերը: Ընդդիմադիր ֆրակցիաների ներկայացուցիչները այդ օրենքի նախագծի համար չեն քվեարկել: