Բողոքի ակցիա. մետրոպոլիտենի աշխատակիցները ևս բողոքում են կուտակային պարտադիր համակարգի դեմ (լուսանկարներ)
Երևանի «Կարեն Դեմիրճյանի» անվան մետրոպոլիտենի գլխամասային գրասենյակի մոտ այսօր առավոտյան հավաքվել են ընկերության մի խումբ աշխատակիցներ, որոնք իրենց դժգոհությունն են արտահայտում պարտադիր կուտակային կենսաթոշակային համակարգի դեմ: Նրանց են միացել «Դ!ԵՄ ԵՄ» նախաձեռնության անդամները:
Ինչպես Tert.am–ի հետ զրույցում նշեց մետրոպոլիտենի աշխատակիցներից մեկը՝ Զավեն Հովհաննիսյանը՝ ինքը նախորդ ամսվա համեմատ 14 000 դրամ պակաս է ստացել:
«Ինձ համար էական չէ՝ օրենքը լա՞վն , թե՝ վատը, ես 14 հազար դրամն եմ ուզում, քանի որ այդքան պակաս եմ ստացել. ստացվում է, որ աշխատավարձը իջել է: Ինձ պետք չէ 30 տարի հետո մտածել՝ ինչ կլինի, ինձ պետք է, որ իմ երեխաներին կարողանամ պահել»,- ասաց մետրոպոլիտենի աշխատակիցը և ավելացրեց, որ Հայաստանում կուտակային կենսաթոշակների մասին օրենքից այդ պարտադիր դրույթը պետք է վերացվի:
Մեկ այլ աշխատից՝ Անդրանիկ Գևորգյանը, որին ի դեպ, չի վերաբում այս օրենքը, քանի որ վերջինս 1973թ. ծնունդ է, նույնպես միացել է պայքարին: Նա նշեց, որ ընկերության 30 աշխատակիցների ստորագրությամբ դիմում են ուղարկել ընկերության ընդհանուր բաժին՝ ներկայացնելով իրենց պահանջները՝ պահումներ չպետք է կատարվեն:
«Օրենքի համաձայն՝ մենք դիմումը գրել ենք ... խոստացել են այսօր մեզ պատասխանել, բայց ասել են, որ օրենքի համաձայն կարող են դա անել 7 օրվա ընթացքում»,- մանրամասնեց ընկերության աշխատակիցը:
Մետրոպոլիտենի տնօրինությունը շենքից դուրս չեկավ՝ ընկերության աշխատակիցների հետ հանդիպելու համար:
«Դ!ԵՄ ԵՄ» նախաձեռնության անդամները տեղեկացրին, որ բողոքի ակցիայի մասնակիցների թիվը ավելի մեծ պետք է լիներ, բայց տնօրինությունը նախօրեին՝ կանխել է հավաքվածների մեծաքանակությունը՝ նրանցից ոմանց վրա ճնշումներ գործադրելու պատճառով:
Հիշեցնենք, որ փետրվարի 10-ին բողոքի ակցիա էին արել նաև Ալ. Սպենդիարյանի անվան օպերայի և բալետի ազգային ակադեմիական թատրոնի աշխատակիցները, որի հետևանքով չէր կայացել «Անուշ» օպերան։










