Ուկրաինայում գնդակահարվել է ցուցարարներին ձերբակալելու որոշում կայացրած դատավորը

13:46 • 12.02.14

Ուկրաինայի Պոլտավայի մարզում անհայտ անձինք գնդակահարել են դատավոր Ալեքսանդր Լոբոդենկոյին, ով բողոքի ակցիաների մասնակիցների նկատմամբ խափանման միջոցի մասին որոշում էր կայացրել, հայտնում է «Կոմերսանտը»:

 

Ուկրաինայի ՆԳՆ-ի փոխանցմամբ՝ միջադեպը տեղի է ունեցել Կրեմենչուկ քաղաքում, դատավորին կրակել են թիկունքից: Դեպքի վայրում հայտնաբերվել են պարկուճներ:

Հարձակումից 2 ժամ անց 34-ամյա Լոբոդենկոն մահացել է հիվանդանոցում:

 

Դատավորը հունվարին քաղաքային խորհրդի շենքը գրավողներին ձերբակալելու թույլտվություն էր սահմանել: Ենթադրվում է, որ նրա դեմ հարձակման հիմքում մասնագիտական գործունեությունն է: