2013 թվականի արդյունքներով՝ լավագույն լուսանկար է ճանաչվել Ջիբութիում աֆրիկացի ներգաղթյալների լուսանկարը

18:19 • 14.02.14

Հայտնի են դարձել World Press Photo լուսանկարների միջազգային մրցույթի հաղթողները: 2013 թվականի արդյունքներով՝ լավագույն լուսանկար է ճանաչվել ամերիկացի լուսանկարիչ Ջոն Սթեյնմայերի «Ազդանշան» աշխատանքը, գրում է gazeta.ru-ն՝ հղում անելով մրցանակի կայքին:

 

Լուսանկարում պատկերված են Ջիբութիի մոտակայքում գտնվող լողափում աֆրիկացի փախստականներ, որոնք բարձրացնում են իրենց հեռախոսները՝ փորձելով կապվել Սոմալիում իրենց բարեկամների հետ:

 

Ջիբութին միջանցիկ կետ է Սոմալիից, Եթովպիայից, Էրիտրեայից փախստականների համար, որոնք փորձում են հասնել մինչև Եվրոպա և Մերձավոր Արևելք:

 

World Press Photo-ն ամենահեղինակավոր միջազգային մրցույթն է, որն անցկացվում է աշխարհի ֆոտոլրագրողների միջև 1955 թվականից:


Հաղթողների աշխատանքների ցուցահանդեսը ցուցադրվում է աշխարհի բազմաթիվ երկրներում: Այս տարի ցուցադրությունը կսկսվի Ամստերդամում ապրիլի 18-ին: