Ալմաթիում ցրել են տենգեի արժեզրկումից դժգոհողների հանրահավաքը
Ալմաթիի (Ղազախստան) ոստիկանությունը ձերբակալել է տեղական արժույթի արժեզրկումից դժգոհողների կազմակերպած բողոքի ակցիայի մասնակիցներին, գրում է lenta.ru-ն:
Ակտիվիստներին ձերբակալել են քաղաքապետարանի մոտակայքում գտնվող կենտրոնական հրապարակում: Ոստիկանները ձերբակալել են հիմնականում բողոքի ակցիայի ամենաակտիվ մասնակիցներին:
Ընդհանուր առմամբ, ակցիային մասնակցել է մոտ 100 մարդ: Հանրահավաքը սկսվել է Հանրապետության պալատի մոտ: Ակտիվիստները փորձել են ճեղքել հրապարակի շուրջ տեղադրված մետաղական պատնեշները, սակայն ոստիկանները նրանց հետ են պահել: Շուտով ակտիվիստների թիվը մեծացել է, և ակցիայի մասնակիցներն ուղղվել են քաղաքապետարան՝ բացականչելով «Առաջ, Ղազախստան»:
Ղազախստանի իշխանությունները տենգեի արժեզրկման մասին հայտարարել են փետրվարի 11-ին: Տենգեի կտրուկ արժեզրկման պատճառով աշխատանքը դադարեցրել են շատ փոխանակման կետեր և խանութներ: Մի շարք առևտրի կետերում զգալիորեն աճել են ապրանքների գները: Կենտրոնական բանկի ղեկավարը հայտարարել է, որ արժեզրկումը հաջող է անցել և որ այն նպաստում է Ղազախստանի տնտեսության աճին:










