Արտագաղթին պետք է հավերժ ո՛չ ասենք և խթանենք ներգաղթը. Լևոն Շիրինյան

12:52 • 15.02.14

Քաղաքագետ Լևոն Շիրինյանն ասում է, որ Ռուսաստանի Դաշնության նոր օրենսդրությունն առիթ է, որպեսզի արտագաղթին ասենք ո՛չ, հավերժ ոչ:

 


«Այս տարի իշխանությունը կոնկրետ պետք է ճանապարհային քարտեզ ստեղծի՝ արտագաղթը կասեցնելու և ներգաղթը խթանելու համար»,- լրագրողների հետ հանդիպման ընթացքում հայտարարեց քաղաքագետն ու ավելացրեց, թե հարկադրական ներգաղթն իր հետ կբերի նաև լրացուցիչ կապիտալ:

 


Լևոն Շիրինյանի համոզմամբ, պետք է գիտաարդյունաբերական պոտենցիալը վերականգնելու հնարավորություն ունենալ:

 


«Եթե երկրում արտագաղթը շարունակվի նույն տենդենցներով, ապա վստահ եղեք, որ պատերազմը մոտենալու է: Եթե ուզում եք պատերազմից խուսափել, կտրուկ կասեցրեք արտագաղթը»,- իշխանություններին կոչ արեց քաղաքագետը՝ նշելով, թե արմատական միջոցներ են պետք ձեռք առնել:

 


Բանախոսի համոզմամբ, մեր ազգային անվտանգության հայեցակարգը թերություն ունի. չկա դեմոգրաֆիական անվտանգության հարցը և երկրում իրավաբանական անվտանգության հարցը: «Այս հարցերին ևս իշխանությունը պետք է ուշադրություն դարձնի և շատ հրատապ»,-ասաց քաղաքագետը:

 


Իր խոսքի վերջում քաղաքագետը կոչ արեց բոլոր հայերին. «Ուր էլ գնաք, որ երկրում էլ աշխատեք, քշելու են այնտեղից՝ երբ որ իրենց հարմար լինի: Այնպես որ, պետք է ապրել և աշխատել քո երկրում: Ի՞նչ է, հեռավոր Մագադանի հողերն ավելի բարեբե՞ր են, քան մեր Հորադիզինը»: