ԱԻՄ–ն առաջարկում է փետրվարի 18-ն ազդարարել Ազատության օր (տեսանյութ, լուսանկարներ)
Երևանի Ազատության հրապարակում այսօր հրավիրված հանրահավաքը մեկնարկին «Ազգային ինքնորոշում միավորում» կուսակցության անդամները նախ հնչեցրեցին Հայաստանի հիմնը, ապա տերունական աղոթքը, ինչից հետո արդեն ԱԻՄ առաջնորդ Պարույր Հայրիկյանը հայտարարեց, թե փետրվարի 18-ը պետք է ազատության օր հռչակվի։
«Այսօր, երբ Հայաստանը կանգնած է ռուսական իմպերիալիզմի նոր դրսևորման՝ երեք բռնապետների դաշինք Մաքսային միությանը բռնակցվելու վտանգի առջև, մենք պարտավոր ենք հիշել մեր պատմությունը և առաջնորդվել մեր արժանավոր նախնիների դասերով»,– ասաց նա։
Պարույր Հայրիկյանը հիշեցրեց, թե ինչպես 1921թ. փետրվարի 18-ին հայերն ապստամբեցին կոմունիստական բռնապետության դեմ և ազատագրեցին Երևանը: Հիմա էլ ակցիայի մասնակիցներին նա առաջարկեց համախմբվել և «ո՛չ» ասել բոլշևիկյան բռնապետ Ռուսաստանի Դաշնությանը:
«ԱԻՄ-ն ավելի քան երկու տասնամյակ կոչ է անում հայ ժողովրդի ազատասիրությունը խորհրդանշող օրը՝ փետրվարի 18-ը, ազդարարել Ազատության օր»,- հայտարարեց Պարույր Հայրիկյանը:
Tert.am-ի հետ զրույցում ԱԻՄ նախագահն ասաց, թե ժամանակին իրենց ասում էին՝ ինչքան կարելի է «անկախությո՜ւն-անկախությո՜ւն» գոչել, բայց 4 տարի պետք եղավ խոսել այդ մասին, մինչև որ հասարակությունը հասավ այն մակարդակին, որ 1991-ին հանրաքվեի ժամանակ «այո» ասաց անկախությանը:
Այնպես որ, ըստ Պարույր Հայրիկյանի, իրենք այնքան են խոսելու ազատության մասին, մինչև փետրվարի 18-ը հռչակվի որպես Ազատության օր:










