Ճապոնիայում ձյան տեղումները կաթվածահար են արել խոշոր արդյունաբերական ընկերությունների աշխատանքը

10:54 • 18.02.14

Ձյան տեղումները զգալիորեն կաթվածահար են արել խոշոր արդյունաբերական ձեռնարկությունների աշխատանքը Ճապոնիայի կենտրոնում. ճանապարհների փակ լինելու պատճառով հնարավոր չէ գործարաններ հասցնել տարբեր անհրաժեշտ մասեր, հայտնում է ԻՏԱՌ ՏԱՍՍ-ը:

 

Երկուշաբթի օրվանից կանգ է առել Nissan Motor Co կորպորացիայի հավաքման գործարաններից մեկը Հոնսյու նահանգում: Ընկերության ղեկավարությունը հայտնել է, որ այդ խափանումն առաջիկայում կարող է շատ լուրջ անդրադառնալ իրենց գործունեության վրա:

 

Honda Motor Co-ն նույնպես ձյան պատճառով դադարեցրել է իր հավաքման գործարանի աշխատանքը: Իր աշխատանքն է դադարեցրել Fuji Heavy Industries Ltd.-ն, որը թողարկում է Subaru ավտոմեքենան: Խափանումներով են աշխատում Suzuki Motor Corp-ի գործարանները:

 

Շաբաթ օրվանից Ճապոնիայում ձյան ուժեղ տեղումների պատճառով արտաքին աշխարհից կտրվել են բնակելի շրջաններ: Այնտեղ գործում են մոտ հազար զինվորականներ: Կան նաև զոհեր:
Արագընթաց ավտոճանապարհները վերջնականապես կմաքրվեն փետրվարի 19-ին:

 

Ընդդիմությունը խիստ քննադատության է ենթարկում կառավարության գործողությունները: Կառավարությունը հայտարարել է արտակարգ շտաբի ստեղծման մասին, որը գործ կունենա Ճապոնիայի համար ռեկորդային ձյան տեղումների հետևանքների հետ: