Կիևի Մայդանի բոլոր մուտքերն արգելափակել են ինքնաձիգներով զինված ՃՈ աշխատակիցները
Կիևի Անկախության մայդանի բոլոր մուտքերը, այդ թվում՝ փոքր փողոցները, հրապարակից երկու կիլոմետրի վրա արգելափակված են Ճանապարհային ոստիկանության անցակետերով, որտեղ հսկում են ինքնաձիգներով զինված տեսուչները, գրում է lenta.ru-ն՝ հղում անելով «Ֆակտի» թերթին:
Թերթի տեղեկություններով՝ Ճանապարհային ոստիկանության մեքենաները կանգնած են Լվովսկայա հրապարակում, Շևչենկոյի բուլվարի և Վլադիմիրսկայա փողոցի խաչմերուկում և շատ այլ փողոցներում:
Բացի այդ, զինված աշխատակիցներն արգելափակել են Կիևի մուտքը մայրաքաղաքի շրջակայքով: Քաղաք տանող մայրուղիներն արգելափակված են ավազով մեքենաներով, իսկ անցակետերում ոստիկանությունը ստուգում է բոլոր «կասկածելի» մեքենաներն ու ավտոբուսները: Ոստիկանության աշխատակիցների խոսքերով՝ իրենք մեքենաների սրահներում զենք-զինամթերք են փնտրում:
Այժմ Մայդանի կեսը մնում է ցուցարարների ձեռքում, իսկ մյուս կեսը զբաղեցրել են ներքին զորքերն ու ոստիկանական հատուկ նշանակության ջոկատը:










