Կիևի Մայդանում ցուցարարները գերի են վերցրել հատուկջոկատայիններին. հաղորդվում է 35 զոհի մասին (ուղիղ, թարմացված)
14.00 Kyiv Post-ի լրագրողների տվյալներով՝ Կիևում զոհերի թիվը հասել է առնվազն 35-ի:
13.23 «Ուկրաինսկայա պրավդա»-ի հաղորդմամբ՝ 7 դի է ընկած Կիևի Անկախության մայդանում՝ «Կազացկի» հյուրանոցի մոտակայքում:
Ինչպես հաղորդում է «Ուկրաինսկայա պրավդա»-ի թղթակիցը, դիերը ծածկված են ծածկոցներով: Երևում է, որ նրանք միջին տարիքի տղամարդիկ են: Ինքնապաշտպանության ներկայացուցիչների խոսքերով՝ այս մարդկանց սպանել են ոստիկանական «դիպուկահարները»:
Reuters գործակալության համաձայն՝ զոհերի թիվն առնվազն 15 է։
12.21 Unian.net-ի փոխանցմամբ՝ Ուկրաինայի ակտիվիստները կրկին գրավել են Ուկրաինական տունը և շուրջը բարիկադներ կառուցել, որոշ ակտիվիստներ հետապնդում են փախչող ուժայիններին: Հաղորդվում է, որ «Բերկուտի» մի քանի աշխատակիցներ Կիևում գերի են վերցվել:
Անկախության մայդանում ակտիվիստները հարձակվել են ոստիկանության շարասյան վրա՝ հետ մղելով «Բերկուտի» հատուկջոկատայիններին և նրանցից մի քանիսին գերի վերցրել, գրում է ИТАР-ТАСС-ը՝ հղում անելով տեղական հեռուստատեսությանը: Անկախության մայդանի բեմից կոչեր են հնչում ամրացնել դիրքերը և չշարունակել հարձակումը, քանի որ նրանց կարծիքով՝ ուժայինները փորձ են կատարելու մասնատել մայդանը և հարձակում գործել նրանց վրա:
Առավոտյան հարձակումից հետո Մայդանում կան շատ վիրավորներ և զոհեր, հաղորդում է unian.net-ը: Reuters գործակալությունը հրապարակել է զոհերից մեկի լուսանկարը, որն արված է Անկախության մայդանում:

11.58 Ուկրաինայի Գերագույն ռադայում շտապ տարհանում է հայտարարված: Interfax.ru-ի տեղեկություններով՝ պատգամավորները և աշխատակիցները լքում են խորհրդարանի շենքը:
unian.net-ը հաղորդում է, որ «Բերկուտ» հատուկ ջոկատի շրջանում խուճապ է, նրանք բղավում են, որ ցուցարարների մոտ մարտական փամփուշտներ են: Գերագույն ռադայի մոտ գտնվող «Բերկուտի» հատուկջոկատայինները հեռանում են: Հաղորդվում է, որ Ինստիտուտսկայա փողոցում կա մոտ 3 հազար ցուցարար:
11.42 Կիևում բախումները վերսկսվել են, վիրավորների թիվը շարունակում է աճել:
Ուկրաինայի ներքին գործերի նախարարությունը հայտնում է, որ 20-ից ավելի իրավապահներ են վիրավորվել Կիևի Անկախության մայդանում դիպուկահարի կրակից, գրում է ria.ru-ն:
«Անկախության մայդանում ցուցարարները, հնարավոր է՝ կոնսերվատորիայի շենքից, բացահայտ հրազեն են օգտագործել զինվորականների և «Բերկուտի» նկատմամբ: Այժմ վիրավոր է 20-ից ավելի իրավապահ»,- նշված է հայտարարության մեջ:
Ավելի վաղ ՆԳՆ-ն հաղորդել էր կոնսերվատորիայի պատուհաններից դիպուկահարի կրակոցների հետևանքով չորս վիրավոր աշխատակցի մասին:
Ինչպես հաղորդել էինք ավելի վաղ, Ուկրաինայի առողջապահության նախարարությունը թարմացրել է Կիևի կենտրոնում բախումների հետևանքով մահացածների և վիրավորների մասին տեղեկությունները: Նախարարության տեղեկություններով՝ անկարգությունների սկզբից ի վեր մահացել է 28 մարդ, 445 վիրավոր օգնության համար դիմել է բուժհաստատություններ: Հիվանդանոցներում է գտնվում 287 մարդ:










