Մայդանում վերջնագիր են ներկայացրել՝ Յանուկովիչի հրաժարականը՝ մինչ առավոտ

23:10 • 21.02.14

Անկախության մայդանում հավաքված մարդիկ սուլել են ընդդիմության առաջնորդներին, ովքեր եկել են հայտնելու Ուկրաինայի իշխանությունների հետ քաղաքական ճգնաժամի կարգավորմանն ուղղված համաձայնագիր ստորագրելու մասին:

 

Ինչպես հաղորդում է Украинская правда-ն՝ Մայդանի ցուցարարներից մեկն ընդհատել է Վիտալի Կլիչկոյի ելույթը՝ հայտարարելով, որ եթե նախագահ Յանուկովիչը մինչ փետրվարի 22-ի առավոտյան 10:00-ի դրությամբ հրաժարական չներկայացնի, մարդիկ կգնան զինված հարձակման:

 

Ցուցարարների մեծ մասը միացել է արված հայտարարությանը, իսկ այդ ընթացքում Մայդանի բեմի մոտ են բերվել Կիևում մահացած ակտիվիստների դագաղները:

 

Ավելի վաղ «Ավտոմայդան» շարժումը հայտարարել էր, որ չի ընդունի իշխանությունների հետ կնքված որևէ համաձայնագիր կամ պայմանավորվածություն, բացի նախագահ Վիկտոր Յանուկովիչի հրաժարականից:

 

Украинская правда-ի փոխանցմամբ՝ «Ավտոմայդանի» համապատասխան հայտարարությունը տարածել է ակտիվիստ Սերգեյ Հաջինովը:


Ըստ ցուցարարների հայտարարության՝ նրանց պահանջները նույնն են մնում.

 

1. Իշխանության անհապաղ վերակազմավորում՝ Յանուկովիչի հրաժարականի և արտահերթ նախագահական ընտրությունների հետ մեկտեղ:

 

2. Պաշտոնանկ անել և պատժել հանցավոր հրամանների բոլոր կատարողներին՝ ուժայիններին, դատախազներին, դատավորներին, ոստիկանության տեսուչներին:

 

3. Բոլոր տուժածներին և զոհվածների ընտանիքներին օգնություն հատկացնելը:

 

4. ԵՄ-ի հետ համաձայնագիր ստորագրելը՝ որպես երկրում ժողովրդավարության երաշխիք:

 

5. «Բերկուտ» անօրինական կազմավորման վերացումը:

 

Ինչպես հաղորդվում էր, երեք ընդդիմադիր կուսակցությունների նախագահներն ու նախագահ Յանուկովիչը համաձայնագիր են ստորագրել՝ ուղղված երկրում ներքաղաքական ճգնաժամի կարգավորմանը: