«ՈՒԴԱՌ»-ը Յանուկովիչի անհապաղ հրաժարականն է պահանջում

13:19 • 22.02.14

Ուկրաինայի Գերագույն ռադան պետք է նախագահ Վիկտոր Յանուկովիչի անհապաղ հրաժարականի պահանջով բանաձև ընդունի: Այդ մասին Անկախության մայդանի բեմից հայտարարել է «ՈւԴԱՌ» կուսակցության առաջնորդ Վիտալի Կլիչկոն, գրում է rbc.ru-ն՝ հղում անելով կուսակցության մամուլի ծառայությանը:

 

Այսօր ռադայում նշանակված է նախագահին անվստահություն հայտնելու մասին օրենքի քննարկումը: Այդ մասին հայտարարել է ժողովրդական պատգամավոր Նիկոլայ Ռուդկովսկին:

 

Փետրվարի 21-ի երեկոյան Անկախության մայդանում ելույթի ժամանակ ընդդիմության ներկայացուցիչները հայտարարել են, որ Յանուկովիչը հրաժարական չի տա մոտակա ժամանակներում: Սակայն Վիտալի Կլիչկոյի և Օլեգ Տյագնիբոկի ելույթից անմիջապես հետո բեմ են դուրս եկել «Պրավիյ սեկտոր» շարժման ներկայացուցիչները, որոնք պահանջել են Վիկտոր Յանուկովիչի անհապաղ հրաժարականը:

 

Նրանք հայտարարել են, որ եթե Ուկրաինայի նախագահը հրաժարական չտա մինչև փետրվարի 22-ի ժամը 10:00-ը, նրանք կանցնեն զինված հարձակման: