Մեծ Բրիտանիան պատրաստ է ֆինանսական օգնություն տրամադրել Ուկրաինային

09:19 • 24.02.14

Մեծ Բրիտանիայի ֆինանսների նախարար Ջորջ Օսբորնը հայտարարել է, որ Մեծ Բրիտանիան այլ արևմտյան երկրների հետ պատրաստ է ֆինանսական օգնություն տրամադրել Ուկրաինային, տեղեկացնում է gazeta.ru-ն՝ Reuters գործակալությանը հղումով։

 

«Մենք պետք է պատրաստենք չեքային գրքույկը, որպեսզի Ուկրաինայի ժողովուրդը վերականգնի իր երկիրը»,-ընդգծել է ֆինանսների նախարարը։

 

Միևնույն ժամանակ ճշգրիտ գումարի չափը, որը Մեծ Բրիտանիան և այլ երկրներ կտրամադրեն Ուկրաինային, չի նշվում։

 

«Գլխավոր առաջնահերթությունը քաղաքական կայունության և հասարակական կարգի վերականգնումն է Կիևի փողոցներում և այլ քաղաքներում»,- հայտարարել է Օսբորնը։

 

Ավելի վաղ ԱՄՆ ֆինանսների նախարար Ջեյկոբ Լյուն և «Բատկիվշչինա» խմբակցության ղեկավար Արսենի Յացենյուկը հեռախոսազրույցի ընթացքում քննարկել էին Ուկրաինայի հնարավոր դիմումն Արժույթի միջազգային հիմնադրամ։