Ես ի՞նչ կապ ունեմ «Ցեմենտի» գործարանի պոմպակայանը փակելու հետ.Արարատի մարզպետ

17:37 • 25.02.14

Արարատի մարզպետարանը որևէ առնչություն չունի դեպի «Բարգավաճ Հայաստան» կուսակցության ղեկավար Գագիկ Ծառուկյանին պատկանող «Արարատցեմենտ» գործարան ու հարակից բնակավայրեր տանող ջրանցքի պոմպակայանի անջատման ու ջրազրկման հետ: Tert.am-ին ասաց Արարատի մարզպետ Արամայիս Գրիգորյանը՝ նշելով, որ դա Բնապահպանության նախարարության, Ջրային ռեսուրսների կոմիտեի ենթակայության տակ է:
 

«Ես ի՞նչ կապ ունեմ, ես՝ որպես մարզային իշխանություն, տեղեկացված եմ ամեն ինչից, բայց այդ կառույցներն իմ ենթակայության տակ չեն»,- նշեց մարզպետը:


Հիշեցնենք, որ «Բարգավաճ Հայաստան» խմբակցության պատգամավոր Տիգրան Ուրիխանյանն անդրադարձել էր «Արարատցեմենտ» գործարան ու հարակից բնակավայրեր տանող ջրանցքի պոմպակայանի` ջրազրկմանը, որը նրա խոսքով՝ վնասներ է հասցրել ոչ միայն գործարանին, այլև մի քանի այլ տնեսությունների ու ձկնաբուծարանների, իսկ ջրային ռեսուրսն ուղղվել է դեպի Ադրբեջան: Իսկ Արարատի մարզպետին ու նրա եղբորը՝ «Ավշար» գործարանի սեփականատիրոջը, Ուրիխանյանը մեղադրել էր նրանում, որ ասել էին, թե գործարանը պարտքեր ունի, այն դեպքում, որ չունի:


Tert.am –ին Բնապահպանության նախարարության մամուլի և հասարակայնության հետ կապերի վարչության պետ Արմեն Վարդանյանը ջրազրկման պատճառների մասին խոստացավ տեղեկացնել վաղը: