Երևանում վերջին հրաժեշտը տվեցին աստղաֆիզիկոս Գրիգոր Գուրզադյանին (տեսանյութ)
Հայաստանի գիտությունների ազգային ակադեմիայում այսօր տեղի ունեցավ հայ ականավոր գիտանական, աստղաֆիզիկոս, Հայաստանի գիտությունների ազգային ակադեմիայի ակադեմիկոս Գրիգոր Գուրզադյանի վերջին հրաժեշտի արարողությունը։
Հայկական աստղագիտական ընկերության նախագահ Արեգ Միքայելյանը, Tert.am-ի հետ զրույցում խոսելով աստղաֆիզիկոսի մասին, ասաց, որ Գրիգոր Գուրզադյանին պետք է համարել մեր վերջին մեծ գիտնականներից մեկը:
«Նա տիեզերական աստղագիտության հիմնադիրն էր, և Հայաստանի նման փոքր երկիրը, որ ճանաչված է աստղաֆիզիկայի ոլորտում, նաև նրա շնորհիվ է, և Վիկտոր Համբարձումյանի կողքին պետք է դնել նաև Գրիգոր Գուրզադյանի անունը»,- ասաց Արեգ Միքայելյանը:
Նկարիչ Հաղթանակ Շահումյանն էլ անդրադառնալով Գրիգոր Գուրզադյանին՝ ասաց, որ նա մեր գիտության երևելիներից է, և ցավոք, վերջինն այդ սերնդից:
«Շատ մեծ է Գուրզադյանի դերը, բայց ցավոք, մեր ժողովուրդը շատ չօգտվեց նրանից: Ցավալի է, որ նման մարդիկ հեռանում են: Նրանց ներկայությունը երիտասարդների համար խթան է հանդիսանում ստեղծագործելու համար»,- ասաց Հաղթանակ Շահումյանը:










