Միայն Իրանն է որոշում, թե որքան հարստացնի ուրանը. Սալեհի

10:16 • 25.02.14

Իրանի միջուկային էներգիայի կազմակերպության ղեկավար Ալի Աքբար Սալեհին հայտնել է, որ միայն Իրանի իշխանություններն իրավունք ունեն որոշել, թե ինչ մակարդակի և ինչ ծավալի պետք է հարստացվի ուրանը, հայտնում է РИА Новости-ն՝ վկայակոչելով IRNA գործակալությանը։

 

«Միայն Իրանի Իսլամական Հանրապետությունն է որոշում կայացնում ուրանի հարստացման աստիճանի և ծավալների վերաբերյալ՝ համապատասխան իր կարիքների, և Թեհրանն այդ սկզբունքը համարում է «կարմիր գիծ»»,- ասել է Սալեհին։

 

Հաղորդագրությունում նշվում է, որ այդ խոսքերով Սալեհին պատասխանել է ԱՄՆ պետքարտուղարի տեղակալ Ուենդի Շերմանի հայտարարությանը, ով ԱՄՆ-ի պատվիրակության ղեկավարներից է Իրանի հետ միջազգային միջնորդ «վեցյակի» հետ բանակցություններում։

 

Գործակալությունը չի պարզաբանում, թե հատկապես որ հայտարարության մասին է խոսքը, սակայն Իսրայել կատարած այցի ընթացքում Շերմանն ասել է, որ «կցանկանար, որպեսզի հարստացումը լիներ զրոյական մակարդակում»։