ՀՀ–ն գրանտային օգնություն կստանա՝ ՄՄ–ին անցումը անցավ իրականացնելու համար. Տ. Սարգսյանը՝ Սոչիում Դ. Մեդվեդևի հետ հանդիպման մասին
Ազգային ժողովում այսօր Կառավարության հետ հարցուպատասխանին ԱԺ «Հանրապետական» խմբակցության պատգամավոր Ռուզաննա Մուրադյանը Տիգրան Սարգսյանից հետաքրքրվեց, թե Սոչիի Օլիմպիական խաղերի փակման արարողությունից հետո ի՞նչ հարցեր է քննարկել ՀՀ վարչապետը ՌԴ վարչապետ Դմիտրի Մեդվեդևի հետ. դրանք վերաբերե՞լ են ՄՄ-ին ՀՀ-ի անդամակցությանը, Ատոմակայանին, և ի՞նչ պայմանավորվածություններ են եղել «Ռոսնեֆտի» հետ։
Ըստ ՀՀ վարչապետի՝ հանդիպմանը առանցքային է եղել Մաքսային միության թեման, և խոսել են աշխատանքային խմբերի կողմից կատարած աշխատանքների մասին։
«Մեր գործընկերները օգնում են մեզ նախապատրաստել համապատասխան օրենք, որ անցումը լինի սահուն, իսկ աշխատանքային խմբի ղեկավարները պարբերաբար հաշվետվություն են տալիս այդ մասին»,-նշեց վարչապետը։ Նա նաև նշեց, որ կազմակերպվում են սեմինարներ, քննարկումներ բիզնես հատվածի հետ՝ բացատրելու, թե ինչ է նշանակում ՄՄ և ինչ նորմատիվների դաշտ է գործելու։ Վարչապետը նշեց, որ պայմանավորվածություն է ձեռք բերվել, որ մասնագետներ ժամանեն Հայաստան և ներկայացնեն ռեժիմները։
«Մենք պայմանավորվել ենք, որ լինելու է գրանտային օգնություն ՀՀ Կառավարությանը, որ անցումը լինի անցավ, որ լինի թափանցիկ, տնտեսության, քաղաքացիների համար»,-նշեց նա։
Վարչապետ Սարգսյանը նաև նշեց, որ քննարկվել է նաև աշխատուժի ազատ տեղաշարժի հարցը և ավելացրեց, որ երկկողմ պայմանագիր է կնքելու քաղաքացիների համար բարենպաստ միգրացիոն պայմաններ ստեղծելու համար՝ ՌԴ միգրացիոն օրենքի փոփոխության համատեքստում։
Անդրադառնալով «Ռոսնեֆտ»–ի հետ կապված հարցին, ՀՀ վարչապետը նշեց, որ ՌԴ վարչապետի հանձնարարությամբ կազմվել է համապատասխան հաշվետվություն և հանդիպման ժամանակ լսել են «Ռոսնեֆտ»–ի ղեկավարի հաշվետվությունը, ով ներկայացրել է այն ծրագիրը, որ պետք է 500 մլն դոլարի ներդրում իրականացվի Հայաստանում։
«Ներկայացվեցին մանրամասները, խնդիրները, որ մոտակա շաբաթների ընթացքում լուծենք ծրագիրը «Ռոսնեֆտ»–ի հետ»,-ասաց նա և ավելացրեց, որ Հայաստանի հարաբերական առավելությունն այն է, որ ունենք մասնագետների հզոր բանակ։
Ինչ վերաբերում է ատոմակայանին, ապա Տիգրան Սարգսյանը նշեց, որ պայմանավորվածությունը այն է եղել, որ անհրաժեշտ է գտնել ճիշտ բանաձևը աշխատանքների ֆինանսավորման համար։ «Առաջարկը ընդունվեց ՌԴ վարչապետի կողմից և հանձնարարականներ տվեցինք, որ մոտակա շաբաթների ընթացում հարցը վերջնականապես լուծվի»,-նշեց նա։










