ԱՄՆ-ում հասարակության համար հասանելի կդառնան Բիլ Քլինթոնի շրջանի գաղտնի փաստաթղթերը
ԱՄՆ Արկանզաս նահանգի Լիթլ Ռոք քաղաքում գտնվող Բիլ Քլինթոնի նախագահական գրադարանում հասանելի են դարձել գաղտնի փաստաթղթեր՝ առնչվող այն շրջանին, երբ Քլինթոնը զբաղեցնում էր ԱՄՆ նախագահի պաշտոնը (1993-ից 2001 թվականներին)։ Այդ մասին հայտնել են գրադարանի և ԱՄՆ ազգային արխիվի ներկայացուցիչները, գրում է ИТАР-ТАСС-ը:
Ընդհանուր առմամբ երկու շաբաթվա ընթացքում նախատեսվում է ցուցադրել փաստաթղթերի 33 հազար էջ, այդ թվում՝ Քլինթոնի և իր խորհրդականների միջև գաղտնի բանակցությունների սղագրությունները: Ժամանակի ընթացքում փաստաթղթերին ծանոթանալ հնարավոր կլինի նաև համացանցում:
Ամերիկյան օրենքների համաձայն՝ ԱՄՆ վարչակազմի գործունեությանը վերաբերող գաղտնի փաստաթղթերի մեծ մասը հասանելի կարող է դառնալ 12 տարուց ոչ շուտ: Բացի այդ, կան տարբեր սահմանափակումներ, որոնք կախված են փաստաթղթի գաղտնիության աստիճանից:










