Պատանի երկրապահները երդվեցին Վազգեն Սարգսյանի շիրիմին, կոտրեցին Ադրբեջանի դրոշը (տեսանյութեր)

15:45 • 05.03.14

Պատանի երկրապահները ցուցադրական ելույթներով հանդես եկան սպարապետ Վազգեն Սարգսյանի ծննդյան առթիվ Եռաբլուր պանթեոնում կազմակերպված հանդիսավոր միջոցառմանը, ինչպես նաև տվեցին իրենց երդումները:


Ցուցադրական վարժություններով հանդես եկան պատանի երկրապահների տարբեր շրջանների ստորաբաժանումներ, նրանք նաև կոտրեցին Ադրբեջանի դրոշը՝ պատկերված պեմզաբլոկի վրա:


Հանդիսավոր ելույթներով հանդես եկան ՀՀ Պաշտպանության նախարար Սեյրան Օհանյանը, ԵԿՄ վարչության նախագահ, գեներալ Մանվել Գրիգորյանը և այլ բարձրաստիճան զինվորականներ:


Երդման արարողության կապակցությամբ շնորհավորելով պատանի երկրապահներին՝ Սեյրան Օհանյանն ասաց. «Մենք նորից Եռաբլուրում ենք: Հայ ժողովրդի նորօրյա պատմությունը խոսում է այն մասին, որ մենք այսօր էլ պայքարով ենք ապահովում մեր անկախությունը և նաև ազատ ապրելու իրավունքը: Այսօր մենք գերադասել ենք ոչ թե լավ կահավորված դահլիճներում մեծարանքի խոսքեր ասել մեր զոհված ընկերների հասցեին, այլ գտնվել Եռաբլուրում, որտեղ բոլորս հավասար ենք»:


Վերադառնալով սպարապետին՝ Սեյրան Օհանյանն ավելացրեց. «Վազգեն սպարապետն այն անհատներից էր, որի նվիրումի շնորհիվ մենք կարողացանք ոտքի հանել մեր ժողովրդին: Այսօր մենք նաև յուրովի հաշվետվություն ենք տալիս և՛ երկրապահներին, և՛ սպարապետին»: