Ադրբեջանում ձերբակալված հայը Վերին Կարմիրաղբյուր գյուղի բնակիչ է, Մամիկոն Խոջոյանի ազգականը. գյուղապետ

21:13 • 07.03.14

Տավուշի մարզի Վերին Կարմիրաղբյուր գյուղի գյուղապետ Կամո Չոբանյանը Tert.am-ին ասաց, որ սահմանը հատած և Ադրբեջանում ձերբակալված հայը Վերին Կարմիրաղբյուր գյուղի բնակիչ, 22 ամյա Արսեն Խոջոյանն է:

 

Ավելի վաղ ՀՀ պաշտպանության նախարարության մամլո խոսնակ Արծրուն Հովհաննիսյանը Tert.am-ին հայտնել էր, որ Ադրբեջանում գերի ընկած հայը զինվոր չէ:

 

Կամո Չոբանյանն ասաց նաև, որ Արսեն Խոջոյանն ավելի վաղ Ադրբեջանում գերեվարված Մամիկոն Խոջոյանի հեռավոր ազգականն է:

 

«Անասուն պահելիս է եղել, երեկվանից թանձր մառախուղ էր, հավանաբար մոլորվել է»,-տեղեկացրեց Վերին Կարմիրաղբյուրի գյուղապետը:

 

Tert.am-ը տեղեկացրել էր, որ Ադրբեջանի Թովուզի շրջանի մոտակայքում սահմանը հատած Հայաստանի քաղաքացի է ձերբակալվել։