Տիմոշենկոն ժամանել է Գերմանիա՝ բուժման նպատակով
Ուկրաինայի նախկին վարչապետ Յուլյա Տիմոշենկոն մարտի 7-ին մեկնել է Գերմանիա՝ ողնաշարի բուժման կուրս անցնելու նպատակով, հայտնում է Корреспондент-ը։
Ինչպես հայտնում է DPA գործակալությունը, Տիմոշենկոյի ինքնաթիռը վայրէջք է կատարել Բեռլինի Շենեֆելդ օդանավակայանում, որտեղից նա անմիջապես ուղևորվել է «Շարիտե» կլինիկա։
Այնտեղ մարտի 8-ին մամուլի ասուլիս կկայանա Տիմոշենկոյին բուժել պատրաստվող բժիշկների մասնակցությամբ։ Անձամբ նախկին վարչապետը մամուլի ասուլիսին ներկա չի լինի։
«Բացի այդ, նա չի պատրաստվում որևէ հարցազրույց տալ Բեռլինում գտնվելու ընթացքում»,- նշել են կլինիկայում։
Ըստ գերմանական օրենքների՝ բժիշկներն իրավունք չունեն իրենց հիվանդների մասին տեղեկություններ տարածել առանց նրանց ցանկության։ Այդ պատճառով էլ կլինիկայի ներկայացուցիչները հրաժարվում են մեկնաբանել Տիմոշենկոյի առողջական վիճակը։










