Յացենյուկն Օբամայի հետ կքննարկի Ղրիմի խնդրի կարգավորման ուղիները

10:55 • 12.03.14

Ուկրաինական պատվիրակությունը՝ վարչապետ Արսենի Յացենյուկի գլխավորությամբ, այսօր հանդիպում կունենա ԱՄՆ-ի նախագահ Բարաք Օբամայի հետ, հայտնում է Interfax-ը՝ վկայակոչելով Ուկրաինայի ԱԳՆ-ի հայտարարությունը:

 

Ըստ այդմ՝ Օբաման ու Յացենյուկը կքննարկեն Ղրիմում ստեղծված իրավիճակի կարգավորման ուղիները, ինչպես նաև՝ տնտեսական սատարման և Ուկրաինայում նախագահական ընտրություններին պատրաստվելու շուրջ հարցեր:

 

Ամերիկյան կողմը հայտնել էր, որ Օբաման Յացենյուկին Սպիտակ տուն է հրավիրել՝ «աջակցություն հայտնելու համար»:

Վաշինգտոնում ուկրաինական պատվիրակությունը հանդիպումներ կանցկացնի նաև Կոնգրեսի, Արժույթի միջազգային հիմնադրամի և Համաշխարհային բանկի ներկայացուցիչների հետ:

 

Մարտի 13-ին էլ նախատեսվում է Յացենյուկի այցը Նյու Յորքում ՄԱԿ-ի շտաբ-բնակարան: Նա կմասնակցի ՄԱԿ-ի Անվտանգության խորհրդի՝ Ուկրաինայի հարցով բաց նիստին, որը նախաձեռնվել է Ուկրաինայի խնդրանքով:

Ըստ ուկրաինական կողմի՝ նախատեսվում է նաև Բան Կի-մուն - Յացենյուկ հանդիպում: