Ուկրաինան հրաժարվել է զորք մտցնել Ղրիմ

08:17 • 12.03.14

Կիևը չի պատրաստվում զորքեր մտցնել Ղրիմի ինքնավարության տարածք, հայտարարել է Ուկրաինայի նախագահի պաշտոնակատար Ալեքսանդր Տուրչինովը France-Press-ին տված հարցազրույցում:


Տուրչինովի խոսքով՝ եթե Կիևը վճռի ռազմական գործողություն սկսի Ղրիմում, ապա Ռուսաստանի հետ արևելյան սահմանը պաշտպանված չի լինի: Գործիչը պնդում է, որ Ռուսաստանը տանկային ուժեր է կուտակել Ուկրաինայի հետ սահմանին և սադրում է Կիևին, որպեսզի զորքեր մտցնելու համար անհրաժեշտ պայմաններ ստեղծի:


Տուրչինովն ասել է, որ Ուկրաինայում չեն պատրաստվում Կրեմլում հորինված սցենարին տուրք տալ: Սակայն եթե Ռուսաստանը հարձակվի Ղրիմում ուկրաինացի զինվորականների վրա, ապա դրան կհաջորդի ուկրաինական բանակի արձագանքը:


Ալեքսանդր Տուրչինովը հայտարարել է, որ Ռուսաստանը հրաժարվում է դիվանագիտական քայլերի դիմել և շփվել ԱԳՆ-ների մակարդակում: Նա կարծում է նաև, որ ԵՄ-ն ու ԱՄՆ-ն պետք է Ռուսաստանին ստիպեն դադարեցնել ռազմական ագրեսիան Ուկրաինայի հանդեպ:


Ուկրաինայի նախագահի պաշտոնակատար արդեն իսկ «կեղծիք» է անվանել հանրաքվեն, որ պատրաստվում են անցկացնել Ղրիմում մարտի 16-ին՝ ինքնավարության նոր կարգավիճակը որոշելու համար: Նրա կարծիքով հանրաքվեն ոչ թե Ղրիմում է կայանալու, այլ՝ Կրեմլի կաբինետներում:


Ռուսաստանը չի ճանաչում Տուրչինովին՝ որպես օրինակարգ նախագահ՝ այդպիսին համարելով երկրից փախած Վիկտոր Յանուկովիչին: