Չինական արբանյակը գտել է անհետացած Boeing-ի կործանման ենթադրյալ վայրը
Չինական արբանյակը հայտնաբերել է անցյալ շաբաթ անհետացած Malaysia Airlines ինքնաթիռի անհետացման ենթադրյալ վայրը. տեղեկացնում է kommersant.ru-ն:
Լուսանկարի վրա երեք օբյեկտ է պատկերած, որոնք, հնարավոր է, կործանված ինքնաթիռի մնացորդներ են:
Լուսանկարները հրապարակել է Չինաստանի ազգային պաշտպանության նախարարության գիտության, տեխնոլոգիաների և արդյունաբերության վարչությունը:
Հաղորդվում է, որ դրանք արվել են ինքնաթիռի անհետացումից մեկ օր անց՝ մարտի 9-ին, սակայն հրապարակվել են միայն մարտի 12-ին:
Հայտնաբերված օբյեկտներից ամենամեծը 24 մետր երկարություն և 22 մետր լայնություն ունի:
Ինքնաթիռի կործանման հնարավոր վայրին դարձյալ մոտենում են Վիետնամի որոնողա-փրկարարական ծառայության աշխատակիցները: «Վերջին 3 օրերին մենք արդեն այնտեղ ենք ուղարկել ինքնաթիռներ՝ ստուգելու տեղանքը: Այսօր ևս ինքնաթիռ կուղարկվի այնտեղ», - ասել է Վիետնամի տրանսպորտի նախարարը:
Մալայզիայի իշխանությունները ևս փրկարարներ են ուղարկելու չինական արբանյակների ֆիքսած վայրը:










