Սա քաղաքական բլեֆ է. ՀՀԿ ԳՄ նիստում չի քննարկվել ոչ կոալիցիոն ուժերի կողմից Կառավարությանն անվստահություն հայտնելու հարցը

23:32 • 20.03.14

Հայաստանի հանրապետական կուսակցությունն այսօր կայացած Գործադիր մարմնի նիստում չի քննարկել ոչ կոալիցիոն չորս ուժերի կողմից Կառավարությանն անվստահություն հայտնելու հարցը:


ԳՄ նիստից հետո լրագրողների հետ ճեպազրույցում ՀՀԿ մամուլի խոսնակ Էդուարդ Շարմազանովը նշեց, որ ինքը նման հայտարարություն լսել է միայն «Հայ ազգային կոնգրես» խմբակցության ղեկավար Լևոն Զուրաբյանից, մյուս ուժերի ներկայացուցիչներից չի լսել ո´չ հաստատում, ո´չ էլ` հերքում:

 

«Եթե ԲՀԿ-ի անունից Լևոն Զուրաբյանն է հանդես գալիս, դա ուրիշ խնդիր է… Բայց այդ թեման չի քննարկվել, որովհետև քաղաքական մեծամասնությունն ինքն է իր օրակարգը մշակում: Բոլորիս հատնի է, որ քաղաքականությունը հնարավորի արվեստ է, այսինքն` քաղաքական ուժերը պետք է ձգտեն անել այն, ինչ հնարավոր է, իսկ քաղաքական փոքրամասնությունը ցանկացած երկրում չի կարող Կառավարություն փոխել և վերակազմավորել, որվհետև եթե քաղաքական փոքրամասնությունը փոխի Կառավարությունը, կլինի իշխանութուն: Ընդդիմությունը նրա համար է կոչվում ընդդիմություն, որ փոքրամասնություն է և չի կարող խորհրդարանում Կառավարությանն անվստահություն հայտնել. սա քաղաքական բլեֆ է ընդամենը»,-ասաց նա:

 

Էդուարդ Շարմազանովն ընդգծեց, որ դժգոհությունները, բողոքի ակցիաները բնական երևույթ են բոլոր երկրների համար, բայց բոլոր ժողովրդավարական երկրներում նոր կառավարություն նշանակելու մենաշնորհը պատկանում է այն կուսակցությանը, որը ժողովրդի մեծամասնության կողմից ստացել է վստահության քվե:

 

«Այսօր քաղաքական դաշտի պատկերը հետևյալն է՝ կոալիցիան, ի դեմս ՀՀԿ-ի ու ՕԵԿ-ի, մեծամասնություն է, և Նախագահի գլխավորությամբ իրենք են որոշում՝ ինչպիսի քաղաքական ծրագիր իրականացնեն, Կառավարության ինչպիսի կազմով, ուստի ընդդիմությունն ու այլընտրանքը նման հնարավորութուն չունեն»,-ասաց նա:

 

Էդուարդ Շարմազանովը նաև հարկ համարեց ընդգծել, որ իշխանությունն ուժեղ է, միահամուռ է ու նրա խնդիրն է՝ լուծել հասարակության խնդիրները, և ընդդիմությունն ու իշխանությունը ո´չ թե պետք է աթոռակռիվ տանեն, այլ՝ ծրագրերի, որպեսզի « ժողովրդի մատից փուշ հանեն»:

 

«Ես ընդդիմության կողմից չեմ լսել որևէ առաջարկ, որևէ ծրագիր ո´չ բյուջեի քննարկման ժամանակ, ո´չ Կառավարության ծրագրի քննարկման ժամանակ: Քննադատելը նորմալ է, երբ առաջարկություններ ունես, իսկ ցանկություններով առաջնորդվելը… Եթե ՀԱԿ-ը խոսում է ամբողջ իշխանափոխության մասին, ապա ԲՀԿ-ից ես նման բան չեմ լսել, ավելին` կուսակցության առաջնորդը նախկինում ասել է, որ ԲՀԿ-ն չի կարող լինել ընդդիմություն: Վերջերս ԲՀԿ-ի առանցքային դեմքերից մեկն ասել էր, որ ամբողջական իշխանափոխության հարց չկա, իսկ Աղվան Վարդանյանն ասել է, որ ո´չ ամբողջական իշխանափոխության հարց կա, ո´չ էլ՝ Սերժ Սարգսյանի հրաժարականի»,-ասաց նա:

 

Դիտարկմանը, թե ընդդիմությունից հնչում են կարծիքներ, որ իշխանությունը տարբեր մեթոդներով առաջիկայում կփորձի խանգարել 4 ուժերի համագործակցությանը, Էդուարդ Շարմազանովը պատասխանեց.


«Առաջին` ուժեղները երբեք չեն խանգարում, այլ՝ նախաձեռնում են բարեփոխումներ: Երկրորդ` մենք չենք կարող խանգարել մի գործընթացի, որը ողջունում ենք: Եթե հետևել եք հանրապետականների, այդ թվում՝ իմ հայտարարություններին, ապա միշտ ասել ենք, որ դրական ենք գնահատում ցանկացած կոնսոլիդացիա, որովհետև ամբողջ աշխարհը գնում է կուսակցությունների խոշորացման ճանապարհով, և չի բացառվում, որ հաջորդ ընտրություններին համախմբվեն, դառնան մեկ դաշինք: Մենք ինչու՞ պետք է խոչընդոտենք»,-ասաց նա:

 

ՀՀԿ խոսնակն ընդգծեց, որ իրենք շահագրգռված են ու շատ ուրախ կլինեն, որ երկրում ձևավորվի առողջ, գաղափարական, կառուցողական ընդդիմութուն:


«Կստացվի՞, թե՞ ոչ՝ դժվար է ասել, քայլը իրենք պետք է անեն, մենք կտեսնենք, ընտրությունները յոթ սարերի ետևում չեն»,-ասաց նա: