Մալայզիական օդանավի ուղևորների հարազատները բողոքի ցույց են կազմակերպել Պեկինում (լուսանկարներ)
Մալայզիական անհետացած Boeing-ը, որի կործանումը հաստատվել էր նախօրեին, հուզումների առիթ է դարձել Չինաստանում. այնտեղ օդանավի ուղևորների հարյուրավոր հարազատներ բողոքի ցույց են անցկացրել Մալայզիայի դեսպանատան մոտ, հայտնում է Russia Today-ը: Նրանք Մալայզիայի իշխանություններին մեղադրել են MH370 չվերթի վերաբերյալ ստելու և ապակողմնորոշիչ տեղեկատվության համար:
Երեկ Malaysian Airlines-ը հայտարարություն էր տարածել, որով հաստատում էր երկու շաբաթ առաջ անհետացած օդանավի 239 ուղևորների մահը: Նման հայտարարությամբ էր հանդես եկել նաև երկրի վարչապետը։
Վշտահար հարազատները դրանից հետո փորձել են գրոհել Պեկինում Մալայզիայի դեսպանատունը, սակայն ոստիկանությունը նրանց զսպել է: Նրանք ամոթանք են տվել իշխանություններին, դեսպանին պահանջել դուրս գալ, իշխանություններին անվանել մարդասպաններ:
Ըստ Xinhua-ի՝ ցույցից հետո դեսպանը հայտնել է, որ ավիաընկերությունը պատրաստ է լրացուցիչ փոխհատուցում վճարել հարազատներին:













