Օբաման առաջարկում է վերջ դնել հետախուզական գաղտնալսումներին
ԱՄՆ-ի նախագահ Բարաք Օբաման պատրաստվում է դիմել Կոնգրեսին՝ առաջարկելով վերջ դնել Ազգային անվտանգության գործակալության (ԱԱԳ) կողմից զանգվածային գաղտնալսումներին ու այդ տվյալների հավաքագրմանը։ Ինչպես հայտնում է Al Arabiya-ն, այս մասին տեղեկացրել է Օբամայի աշխատակազմի բարձրաստիճան մի ներկայացուցիչ։
Եթե Կոնգրեսը հավանություն տա Օբամայի առաջարկին, ապա կդադարեցվի ԱՄՆ-ի տարածքում կատարվող միլիոնավոր հեռախոսազանգերի գաղտնալսման ու դրանց հիման վրա տվյալների հավաքագրման գործընթացը։
Փոխարենը կառավարությունը պետք է թույլտվություն ստանա Արտաքին հետախուզության վերահսկման դատարանից (Foreign Intelligence Surveillance Court) որոշակի անձանց հեռախոսազանգերի մասին տվյալներ ստանալու համար։ Սակայն The New York Times-ը հավելում է, որ նման հարցումը կարող է ներկայացվել, եթե կառավարությունը կասկածներ ունի, որ զանգահարողն ինչ- որ կապ ունի ահաբեկիչների հետ։










