Օբաման Հռոմի պապի հետ առաջին հանդիպմանը նրան բանջարեղենի սերմեր է նվիրել (լուսանկարներ, տեսանյութ)
ԱՄՆ-ի նախագահ Բարաք Օբաման Եվրոպա կատարած քառօրյա այցի շրջանակներում պատմական հանդիպում է ունեցել Կաթոլիկ եկեղեցու հովվապետ Ֆրանցիսկոս պապի հետ։ Ինչպես հայտնում է Business Insider-ը, Օբաման ու պոնտիֆիկոսը հանդիպման ժամանակ իրար ողջունել են ձեռքսեղմումով ու փոխադարձ ժպիտներով։
«Ձեզ հանդիպելը հրաշալի է։ Ինձ համար դա մեծ պատիվ է։ Ես հիանում եմ Ձեզնով։ Շնորհակալ եմ ինձ ընդունելու համար»,-ասել է Միացյալ Նահանգների նախագահը, ինչին Պապը պատասխանել է .«Շնորհակալություն»։
Սպիտակ տան տարածած հաղորդագրության մեջ նշվում է, որ 1 ժամից էլ պակաս տևած հանդիպման ընթացքում Օբաման ու Ֆրանցիսկոսը քննարկել են աշխարհում աղքատության ու աճող անհավասարության դեմ պայքարի թեման։
Նշվում է, որ Օբաման Ֆրանցիսկոսին է նվիրել իր կնոջ՝ Միշել Օբամայի անմիջական հսկողության տակ գտնվող՝ Սպիտակ տան պարտեզում աճող մրգերի ու բանջարեղենի սերմերով լի զամբյուղ։


















