Սաուդյան թագավորի նախկին կինը խնդրել է Օբամային ազատել 13 տարի պալատում փակված իր 4 դուստրերին
Սաուդյան Արաբիայի միլիարդատեր միապետ Աբդուլլահի նախկին կինը՝ 57-ամյա Ալանուդ Ալ Ֆայեզը, հրապարակայնորեն դիմել է ԱՄՆ-ի նախագահ Բարաք Օբամային, որպեսզի նա օգնի ազատել 13 տարի թագավորական պալատում փակի տակ գտնվող իր 4 չափահաս դուստրերին։

Ինչպես նշում է Daily Mail-ը, Ֆայեզն ասել է, որ Օբաման միապետի հետ սպասվելիք հանդիպումը պետք է որպես պատեհ առիթ օգտագործի՝ իր աղջիկներին օգնելու ու նրանց բռնություններից ազատելու համար։

Պարբերականը նշում է, որ 2003թ. Աբդուլլահ արքայից ամուսնալուծվելուց հետո կինն ապրում է Լոնդոնում, սակայն աղջիկները մնացել են հոր մոտ, ով նրանց չափազանց վատ է վերաբերվում։

Agence France Presse գործակալության հետ զրույցում կինն ասել է, որ իր 4 դուստրերը՝ Սահարը, Մահան, Հալան ու Ջավահիրը, պահվում են որպես գերի՝ ամբողջ աշխարհից կտրված։ Նրանց օրական 1 անգամ է սնունդ ու ջուր տրվում, իսկ շենքից դուրս գալու մասին անգամ խոսք լինել չի կարող։
Ալ Ֆայեզը դուստրերին ազատելու կոչով դիմել է անգամ ՄԱԿ-ի մարդու իրավունքների հարցերով հանձնակատարին, սակայն՝ ապարդյուն։











