Օբամայի այցի համար փակվել է Կոլիզեումը

09:30 • 28.03.14

Կոլիզեում ԱՄՆ-ի նախագահ Բարաք Օբամայի այցով ավարտվել է նրա ուղևորությունն Իտալիա, հայտնում է ԻՏԱՌ ՏԱՍՍ-ը:

 

Այնտեղ Օբամային ամենից շատ տպավորել են դրա չափերը, ինչի առիթով Օբաման ասել է. «Անհավանական է, Կոլիզեումն այսօր գոյություն ունեցող բեյսբոլի ցանկացած դաշտից մեծ է»:

 

Օբամայի այցի համար Հին Հռոմի ամենահայտնի հուշարձանը փակված է եղել մեկ օրով: Դա մոտ 130 հազար եվրո է արժեցել, եթե հաշվի առնենք, որ օրական Կոլիզեում է այցելում 10-12 հազար մարդ՝ տոմսի համար վճարելով 12-14 եվրո:

 

Բարձրաստիճան զբոսաշրջիկի համար էքսկուրսիա է անցկացրել Կոլիզեումի տեխնիկական տնօրեն Բարբարա Նաձարոն: Օբաման եղել է նաև այն միջանցքներում, որտեղից արենա են դուրս եկել գլադիատորները:

 

Կոլիզեումում էքսկուրսիա անցկացնելու մասին խնդրել է ամերիկյան կողմը: Կոլիզեումից բացի փակվել են նաև շրջակա հուշանվերների խանութները, մետրոն, հեռացվել են գլադիատորների հագուստներով զբոսաշրջիկների հետ լուսանկարվող դերասանները: