Ուկրաինայի և Լիտվայի նախաձեռնությամբ մարտի 31-ին ՄԱԿ-ի ԱԽ-ի նիստ կգումարվի
Ուկրաինայի և Լիտվայի նախաձեռնությամբ մարտի 31-ին տեղի կունենա ՄԱԿ-ի Անվտանգության խորհրդի նիստ: Ինչպես հայտնում է Корреспондент-ը` այս մասին ուրբաթ` մարտի 28-ին կայացած ճեպազրույցում հայտարարել է Ուկրաինայի ԱԳՆ տեղեկատվական քաղաքականության վարչության տնօրեն Եվգենի Պերեբիյնիսը:
ԱԳՆ ներկայացուցչի խոսքով` այս միջոցառմանը կարող են մասնակցել ինչպես ՄԱԿ-ի անդամ պետությունները, այնպես էլ` ոչ կառավարական կազմակերպությունների և քաղաքացիական հասարակության ներկայացուցիչները:
«ՄԱԿ-ի ԱԽ-ի լիտվական ղեկավարությունը նիստին մասնակցելու է հրավիրել Ղրիմի թարար ժողովրդի Մեջլիսի նախկին ղեկավար Մուստաֆա Ջեմիլևին և ղրիմցի լրագրող, Սիմֆերոպոլի տեղեկատվական կենտրոնի տնօրեն Վալենտինա Սամարին», - դիվանագետի խոսքերը մեջբերում է УНН գործակալությունը:
Ավելի վաղ ԱԳՆ-ից հայտնել են, որ Ռուսաստանի կողմից Սևծովյան նավատորմի տեղակայման մասին համաձայնագրի չեղյալ հայտարարումը կնշանակի, որ ՌԴ-ն կարող է դուրս բերել իր նավատորմը Ղրիմից:










