Ազատամարտիկների նոր միավորում ստեղծել պետք չէ, մենք արդեն կազմակերպություն ենք. Սուրեն Սարգսյան

21:40 • 28.03.14

Ազատամարտիկների ռազմադաշտային միավորման նախագահ Սուրեն Սարգսյանը գտնում է, որ ազատամարտիկների նոր կազմակերպություն ստեղծել պետք չէ, իրենք հենց կազմակերպություն են`այնպիսին, ինչպիսին Ազատամարտիկների ռազմադաշտային միավորումն է, որը դարձել է աշխատանքային խումբ:

 

«Մեր շարքերը համալրվել են, և  ես վստահ եմ, որ մենք իրենց կտեսնենք մեր կողքին, որովհետև իրենք մեր ընկերներն են»,-Tert.am-ի հետ զրույցում ասաց նա՝ մեկնաբանելով տեղեկությունները, թե «Բարգավաճ Հայաստան» կուսակցությունը ազատամարտիկների նոր միավորում է ստեղծում:
Սուրեն Սարգսյանը, ով ամիսներ շարունակ իշխանափոխության պահանջով հանրահավաքներ իրականացնող մի խումբ ազատամարտիկների հետ Ազատության հրապարակ էր դուրս եկել, նշեց, որ ինքը միայն ստեղծված իրավիճակից ելքը կարող է ասել. «Դա այն է, որ այնտեղ, ի դեմ Ռուստամ Գասպարյանի, մենք լավ ընկեր ունենք, և մենք սպասում ենք մեր ընկերներին, որ գան ու միանան մեզ»:


Իսկ հարցին, թե արդյո՞ք նոր ստեղծվող կառույցը հակակշիռ էԵրկրապահ կամավորականների միավորմանը, նա չցանկացավ պատասխանել, միայն ավելացրեց, որ ազատամարտիկների սոցիալական հարցերով զբաղվելուց առաջ պետք է նախ` երկրի «խուժանին քշել»:

 

«Եթե չքշենք, ընդամենը կյուրոսյան հաղթանակների պես բան կլինի: Մեկին մի կտոր հաց ավել կամ պակաս տալու հարց է, բայց նախ պետք է երկիրն օրինական դարձնել, երկրի հանցագործ իշխանություններին քշել, որից հետո բոլոր հարցերը, այդ թվում` սոցիալական խնդիրները կկարգավորվեն, իսկ էսպես պարզապես մտածել մեր սոցիալական հարցերը լուծելու մասին` այս իշխանության առկայության պարագայում անհնար է»,-ասաց Սուրեն Սարգսյանը:


Վերջինս նաև նշեց, թե չի կարծում, որ ԲՀԿ-ն փորձում է ազատամարտիկներին իր կողմը քաշել, քանի որ ազատամարտիկները Հայաստանի կողմն են:

«Ես վստահ եմ, որ դուք մեզ բոլորիս մի տեղում կտեսնեք,այդ թվում` այդ միավորման մեջ ընդգրկվող մեր ընկերներին: Մենք բոլորս մեկ ենք դառնալու, շատ շուտով դուք դրա դրսևորումները կտեսնեք»,-եզրափակեց նա: