Ցեղասպանությունը միայն զոհերը չեն, կան այլ կոմպոնենտներ. Պ. Հովհաննիսյանը՝ Քեսաբը ցեղասպանություն չորակելու կոչերի մասին
Պատմաբան, աղբյուրագետ, պատմական գիտությունների թեկնածու, պրոֆեսոր Պետրոս Հովհաննիսյանը համաձայն չէ ոմանց այն գնահատականին, որ Քեսաբում կատարվածը ցեղասպանություն չի կարելի որակել, որովհետև այնտեղ հայ զոհեր չեն եղել:
Tert.am-ի հետ զրույցում Պետրոս Հովհաննիսյանը հիշեցրեց.«Ցեղասպանությունը միայն զոհերը չեն, ցեղասպանություն է նաև բնիկ բնակչության տեղահանումն ու նրանց հայրենազրկումը: Այս երևույթը ունի շատ այլ կոմպոնենտներ»:
Հիշեցնենք, որ այսօր հրապարակախոս Մարինե Պետրոսյանը, մեդիա փորձագետ Սամվել Մարտիրոսյանը սոցիալական ցանցերում զգուշացրել էին Քեսաբի հետ կապված որոշ վտանգների մասին:
«Քեսաբի վերաբերյալ իրականությանը չհամապատասխանող տեսանյութեր տարածելը և Քեսաբում կատարվածը ցեղասպանություն որակելը բերելու է հետևյալին․ թուրքերը մի քանի օրից դեմ են տալու, որ հայերը սուտ տեղեկատվությունով աշխարհին լացացնում են ու նույնն արել են 15 թվի վերաբերյալ։ Մի´ տարածեք չստուգված նյութեր ու ցեղասպանություն մի անվանեք Քեսաբում կատարվողը։
Հ. Գ. Թյուր կարծիք չձևավորվի, որ ես Քեսաբի դեպքերը չեմ համարում ողբերգական։ Հենց քեսաբցիների համար է պետք միայն ճշգրիտ տեղեկատվություն։ Թուրքերին պատասխանատվության բերելու համար պետք է զգոն լինենք»,-առաջարկել էր Սամվել Մարտիրոսյանը:
Ի պատասխան Պետրոս Հովհաննիսյանը հարցնում է՝ ո՞վ կարող է ասել՝ Քեսաբում հայերի սպանե՞լ են, թե՞ ոչ:
Ինչ վերաբերում է հեռուստատեսությամբ, մամուլով ու սոցցանցերով հնչեցված առաջարկին, թե քեսաբահայերին պետք է տեղափոխել Հայաստան, գիտնականը հայտարարեց, որ ոչ մի քեսաբահայ Հայաստան չի տեղափոխվի:
«Այդ հարցը կկարգավորվի, նրանք էլ կվերադառնան Քեսաբ, կարող է ՝ ինչ-որ ընտանիք ուզենա գալ, բայց սիրիացիները չեն գալիս, նույնիսկ՝ ամենբարդ շրջանի՝ Հալեպի հայերը»,-ասաց պատմաբանը:










