Ծառերի ծաղկումն արհեստականորեն ուշացնելու տեխնոլոգիան թանկ հաճույք է. գյուղփոխնախարար
Կան մի շարք տեխնոլոգիաներ, այդ թվում նաև՝ բերքատու ծառերի ծաղկումը արհեստականորեն երկարաձգող, որոնք կիրառվում են գյուղատնտեսության մեջ՝ բնության արհավիրքներից ապահովագրվելու համար, սակայն դա շատ թանկ հաճույք է:
Այս մասին Tert.am-ին հայտնեց գյուղատնտեսության փոխնախարար Գառնիկ Պետրոսյանը՝ մեկնաբանելով այն քննադատությունները, ըստ որոնց՝ գյուղացիներին sms –ներ ուղարկելու փոխարեն գյուղնախարարությունը կարող էր օժանդակել գյուղացիներին տարբեր տեխնոլոգիաների կիրառմամբ:
«Դա մեր գյուղացուն հասանելի չէ: Միայն արհեստական երկարաձգումը չէ, բազմաթիվ մեթոդներ կան. այգիների մեջ տեղադրում են տաք օդ, որը բոլոր ուղղություններով սփռում են. կան նմանատիպ ագրեգատներ, որոնք կցվում են տրակտորներին, և այդ ժամանակահատվածում տրակտորներն այգիներում անընդհատ պտույտներ են գործում՝ տաք հոսանք առաջացնելով: Նաև գլիցերին է օգտագործվում, բայց սրանք բոլորը խիստ թանկ հաճույքներ են»,- ասաց գյուղփոխնախարարը:
Հիշեցնենք, որ խիստ ավերիչ գնահատված ցրտահարության նախնական գնահատականներով՝ դրա հիմնական պատճառն այն է, որ այս տարի «գարունը 15 օր առաջ էր», այսինքն՝ ծառերը շուտ էին ծաղկել:
Գառնիկ Պետրոսյանը հավելեց, որ այդ տեխնոլոգիաները շատ բարձր կիրառելիություն չունեն նաև այլ երկրներում և օգտագործվում են միայն շատ բարձրարժեք մշակաբույսերի ու խաղողի այգիներում:
«Եվ երկրորդը՝ այլ երկրներում դեղձի և ծիրանի այգիները հիմնականում ցածրաճ այգիներ են՝ 2.5-3 մետր բարձրությամբ ծառերով, «ոչ թե մեզ նման 7-8-10 մետր բարձրությամբ ծառեր: «Ցածր» այգիներում ձեռնարկված միջոցառումները կարող են արդյունք տալ»,-ասաց Գառնիկ Պետրոսյանը:










