Այսօր նշվում է Հոլոքոստի զոհերի հիշատակի օրը
Այսօր ամբողջ Իսրայելում կհնչեցվի շչակների ձայնը, սակայն այս անգամ ահազանգելով ոչ թե հրթիռային հարձակման մասին, այլ այդ կերպ ազդարարելով Հոլոքոստի զոհերի հիշատակի ոգեկոչումը, հայտնում է HTB-ն:
Իսրայելում ցեղասպանության օրն անվանում են Եվրոպայի և Հյուսիսային Աֆրիկայի հրեաների աղետի և հերոսության օր:
Արարողությունները սկսվել են նախօրեին երեկոյան Երուսաղեմի Յադ վա-Շեմ հուշահամալիրում: Ներկաների թվում նացիստական ագրեսիան վերապրածներ են եղել:
Իսրայելի նախագահ Շիմոն Պերեսն օրվա խորհրդով հիշել է, որ Բելառուսում, օրինակ, հրեաներին ոչ թե գնդակահարում կամ խեղդում էին գազով, այլ հրկիզում էին:
Վարչապետ Բինյամին Նեթանյահուն իր ելույթում խոսել է հակասեմականության մասին, ասել, որ Իրանը չի ճանաչում հրեաների ցեղասպանությունը և ձգտում է վերացնել Իսրայելը:
Իսրայելական ԶԼՄ-ների փոխանցմամբ՝ հրեաներին այս օրվա կապակցությամբ ցավակցել է նաև Պաղեստինի առաջնորդ Մահմուդ Աբբասը՝ ասելով, որ Հոլոքոստը ժամանակակից պատմության ամենամեծ հանցագործությունն էր:










