Ոչ իշխանական ուժերը մի քայլ ավել են անում՝ մտածելով, որ արդեն հաղթել են, բայց միշտ պարտություն են կրում. ԱԺ նախագահ
ԱԺ նորընտիր նախագահ Գալուստ Սահակյանը նկատել է, որ ոչ իշխանական ուժերը մի քայլ ավել են անում՝ մտածելով, որ արդեն հաղթել են, ինչպես իրենք են ասում, բայց միշտ պարտություն են կրում:
ԱԺ-ում այսօր խոսելով «Ակցիզային հարկի մասին ՀՀ օրենքում փոփոխություններ և լրացումներ կատարելու մասին» նախագծի քվեարկությունից, ԱԺ նախագահը նշեց, որ իր համար անակնկալ էր ԲՀԿ-ական պատգամավորի համահեղինակությամբ մշակված նախագծի քվեարկությանը ԲՀԿ-ի չմասնակցելը, քանի որ հիմնական օրինագծի գաղափարները նաև մշակել էր ԲՀԿ-ն՝ հանձին Միքայել Մելքումյանի:
«Ինձ համար շատ տարօրինակ էր, բայց նաև կարծում եմ հետևյալը. քառյակը, եթե փորձում է միասին հարց քննարկել և որոշում է կայացնում, ես կարծում եմ՝ դա էլ է տրամաբանական: Ես դա քաղաքական ակցիա եմ համարում քառյակի կողմից: Քաղաքական գործիչներ կան ընդդիմադիր, որոնք հետևյալն են հորդորում, այսինքն՝ ինչքան քաղաքական կապիտալ ունեք, քայլերը այդ չափով արեք, որպեսզի կամաց-կամաց շահեկան վիճակի հասնեք: Իսկ քառյակի տրամաբանությունը այն է՝ հիմնական ուժերն ասում են՝ ինչու կամաց-կամաց, միանգամից»,- ասաց նա։
Լրագրողների հարցին, թե ԲՀԿ-ի կողմից իր օգտին քվեարկելուց հետո ՕԵԿ-ի ու ԲՀԿ միջև ի՞նչ տարբերություն է տեսնում, Գալուստ Սահակյանը պատասխանեց. «Շատ մեծ տարբերություն կա, տարբեր քաղաքական ուժեր են, տարբեր ուղղվածություններ ունեցող»:
Իսկ թե ՀՀԿ-ի հետ հարաբերություններում ի՞նչ տարբերություն կա այդ երկու ուժերի միջև, նա նշեց. «Մարդկային փոխհարաբերություններ են, բոլորը պիտի փոխհարաբերվեն: Փոխհարաբերությունները կամ հարաբերությունները չի նշանակում, որ մարդիկ մերձեցվեցին իրար հետ, մի տեսակը՝ քաղաքական, մյուսի հետ նույն որակը դարձավ: Յուրաքանչյուր քաղաքական ուժ իր ռազմավարությունն ունի: Էդտեղ նմանություններ, տարբերություններ պետք չէ փնտրել»։










