ԱԺ-ն այսօր կքննարկի Կառավարության նոր ծրագրի նախագիծը. թիրախները խոսուն են
Համաձայն Հայաստանի Հանրապետության Սահմանադրության 74-րդ հոդվածի` ՀՀ Ազգային ժողովի արտահերթ նիստում կսկսվի ՀՀ 13-րդ կառավարության ծրագրի նախագծի քննարկումը, որն անցած ուրբաթ երեկոյան բաժանվել է Ազգային ժողովի պատգամավորներին և արդեն տեղադրված է կառավարության կայքում:
Կառավարության ծրագիրը բաղկացած է 74 էջից, և դրանում հիմնականում ընդգծված են բոլոր այն «մեսիջները», որ վարչապետի պաշտոնում նշանակման պահից ի վեր Հովիկ Աբրահամյանը մինչ այս հղել է. կանգնել գյուղացու կողքին, գործարարների համար հավասար մրցակցային խաղի կանոններ սահմանել, հայրենիքը դարձնել ՀՀ քաղաքացու արժանապատիվ ապրելու հնարավորությունների երկիր և այլն:
Ըստ որում, նկատվում է, որ ոճական առումով փաստաթղթում բայերի օգտագործումն ավելի «իմպերատիվ» բնույթ ունի, քան թեական: Այսպես, օրինակ՝ գրեթե բոլոր պարբերություններում օգտագործվում է «Հայրենիքը դառնալու է» կամ՝ «Կառավարությունն ապահովելու է» և բազմաթիվ նման բառակապակցություններ:
Այդուհանդերձ, թվերի, տվյալների մասին խոսելիս նկատվում է որոշակի զգուշություն՝ «պետք է» բառի զուգորդմամբ: Օրինակ՝ «այս ամենի հիմքում՝ 2014-2017 թթ. տնտեսության ներքին ռեսուրսների վրա հիմնված արտահանման տնտեսական ներուժի և այլ գործոնների բերումով, պետք է ստեղծվեն նախադրյալներ հետագա՝ ավելի հավակնոտ և բեկումնային աճի համար»:
Ինչպես նշվում է նախաբանում, այն մշակվել է` հիմք ընդունելով Կառավարության 2013-ի ծրագրի, ՀՀ ազգային անվտանգության ռազմավարության, ՀՀ Նախագահի, Հայաստանի Հանրապետական կուսակցության նախընտրական ծրագրի հիմնական դրույթները, ինչպես նաև խորհրդարանական կուսակցությունների ծրագրերում ներկայացված` նշված փաստաթղթերի հետ համադրելի գաղափարները:
Կառավարության գերակա շահը ՀՀ քաղաքացին է, իսկ հայրենիքը դառնալու է արժանավայել կյանքով ապրելու հնարավորությունների երկիր
Եվ այսպես ՀՀ կառավարությունը հռչակում է իր գործունեության գերակա նպատակը. ՀՀ քաղաքացին, նրա ազատության երաշխավորումը, անվտանգության և բարեկեցության բարձրացման ապահովումը:
«Հայրենիքը դառնալու է ապահով հանգրվան և սեփական կարողությունների, աշխարհի տարբեր ծագերում կուտակած փորձի և գիտելիքների առավելագույնս դրսևորման հնարավորության երկիր՝ յուրաքանչյուր հայի համար: Հայաստանի Հանրապետությունը պետք է դառնա արժանավայել կյանքով ապրելու հնարավորությունների երկիր` յուրաքանչյուրի համար»,- ասված է ծրագրում:
Ընդգծվում է, որ կարողությունների նման դրսևորման հնարավորություն կարող է ընձեռել միայն հավասար հնարավորություններ և իրական մրցակցություն ապահովող միջավայրը և միայն, հասարակության կողմից արդարացի ընկալվող տնտեսական համակարգն է ունակ ապահովելու ներդրումների աճ, ապագայի նկատմամբ հավատով լեցուն համարձակ կառուցողական քայլերի նախաձեռնում:
Խոստացվում է, որ Կառավարությունն ապահովելու է, որ կանոնները նույնը լինեն բոլորի համար, որ ՀՀ տնտեսությունը բաց լինի թե՛ հայրենական, թե՛ օտար ներդրողների համար: Օտարերկրյա հայտնի ընկերությունների ներգրավումը լինելու է ՀՀ կառավարության առաջնահերթություններից:
Կառավարությունը պետք է աջակցի գործարարին՝ իր գործիքներով լինի անգամ մեկ աշխատատեղ ստեղծող, մեկ նմուշ նոր արտադրանք տվող քաղաքացու կողքին, ապահովի նրա համար գործարարությամբ զբաղվելու հավասար և բարենպաստ պայմաններ:
Սոցիալական հիմնահարցերի շարքում առանձնանում է տնտեսական աճի հետ անմիջականորեն շաղկապված նոր աշխատատեղերի ստեղծումը, բարեկեցիկ կյանք ապահովող վաստակ ունենալու համար կարևորվում է աշխատավարձերի համակարգված աճը, որը խոստացվում է լինել հետևողական և համաչափ:
Կառավարությունը՝ բնապահպանության կողքին լինելով, նաև՝ գյուղացու կողքին
Հաջորդ շեշտադրումն այն է, որ Կառավարությունը հատկապես կարևորելու է գյուղի և գյուղացու կյանքի բարելավման խնդիրը ավելացվելու են առկա գործիքներով գյուղացիական տնտեսությունների աջակցության ծավալները, թե մեկնարկելու է կարևորագույն ենթակառուցվածքային ծրագիր՝ հանրապետության մարզերում գյուղատնտեսության կենսունակությունը լրջորեն բարելավելու ուղղությամբ:
Մասնավորապես, Հովիկ Աբրահամյանի կաբինետը խոստանում է 2014-2017 թվականների ընթացքում էական աշխատանքներ կատարել ջրամբարաշինության բնագավառում՝ սկսելով 4 կարևորագույն ջրամբարների նախագծման և շինարարության համակարգված աշխատանքները: Այս ծրագիրը հնարավորություն կտա ոչ միայն թեթևացնելու Սևանի բեռը, այլև զգալիորեն բարելավել հողագործական աշխատանքների արդյունավետությունը:
Կառավարության գործունեությունից ակնկալվող հիմնական արդյունքները
Նշվում է, որ առաջիկա 3 տարիների ընթացքում տնտեսության ներքին ռեսուրսների վրա հիմնված զարգացումը կունենա Հայաստանի տնտեսական աճի ապահովման համար առաջնային նշանակություն։ ՀՀ կառավարությունը սույն ծրագրի իրականացմամբ 2014-2017 թվականների ընթացքում նպատակադրում է՝ զարգացած երկրների համեմատ տնտեսական աճի առաջանցիկ տեմպերի ապահովում` համախառն ներքին արդյունքի միջնաժամկետ` 5 տոկոս աճի միջոցով. նվազագույն աշխատավարձի աստիճանական բարձրացում՝ մինչև 65000 դրամի, աղքատության կրճատման ապահովում՝ մինչև 10 տոկոսային կետով: Նոր ծրագրի նախագծով՝ 2017 թվականի նվազագույն աշխատավարձը դառնալու է 65 000 դրամ:
Հաշվի են առնված արտաքին ցնցումների դրսևորումները և Հայաստան ներթափանցման ուղիներն ու ազդեցությունները, որոնք նկարագրված են ծրագրի վերջին մասում:
Արտաքին հարաբերությունների ոլորտում կառավարությունը կարևորում է՝
• Լեռնային Ղարաբաղի հիմնախնդրի խաղաղ կարգավորումը,
• Հայոց ցեղասպանության միջազգային ճանաչումն ու դատապարտումը,
• Ռուսաստանի հետ դաշնակցային փոխգործակցության և ռազմավարական հարաբերությունների առավել խորացումն ու ընդլայնումը,
• ԱՄՆ-ի հետ բարեկամական գործընկերության ամրապնդումը,
• Եվրոպական երկրների հետ երկկողմ հարաբերությունների զարգացումն ու ամրապնդումը,
• Անմիջական հարևանների` Վրաստանի և Իրանի հետ հարաբերությունների առավել զարգացումը,
• Հայ-թուրքական հարաբերությունների` առանց նախապայմանների կարգավորումը,
• Չինաստանի, Հնդկաստանի, Ճապոնիայի և Ասիայի այլ երկրների, Աֆրիկայի պետությունների հետ համագործակցության զարգացումը,
• Կանադայի և Հարավային Ամերիկայի երկրների հետ համագործակցության զարգացումը,
• Մերձավոր Արևելքի ավանդական գործընկեր երկրների հետ փոխգործակցության զարգացումը,
• Եվրասիական տնտեսական միությանը և վերջինիս բաղադրիչ մաս հանդիսացող Մաքսային միությանն ու Միասնական տնտեսական տարածքին անդամակցությունը,
• ՀԱՊԿ-ի շրջանակում համագործակցության շարունակական խորացումը։
ԵՄ-ի հետ ասոցացման դրույթների փոխարեն, որը առկա էր նախորդ ծրագրում, նշվում է, ԵՄ-ի հետ հարաբերությունների շարունակական զարգացումն ու ընդլայնումը, այդ թվում՝ Արևելյան գործընկերության շրջանակներում, ԵՄ-ի հետ համագործակցության խորքային բնույթ արտահայտող իրավական նոր շրջանակի ձևավորումը:
Կա խոսք նաև ՆԱՏՕ-ի մասին, այն է՝ ՆԱՏՕ-ի հետ քաղաքական երկխոսության շարունակումը, Անհատական գործընկերության գործողությունների ծրագրի հետևողական իրականացումը։
Կա մեկ թիրախ ևս՝ Հայաստանի ներդրումային հեղինակության բարելավումը, վստահելի գործընկերոջ համբավի ամրապնդումը:
Կառավարության ծրագիրը և քառյակն ու «Օրինաց երկիրը»
Հիշեցնենք, որ ոչ իշխանական քառյակի վերջին նիստում ԱԺ «Հայ ազգային կոնգրես» խմբակցության ղեկավար Լեւոն Զուրաբյանը հայտնեց, որ առաջնահերթ քննարկվել է Կառավարության ծրագրի շուրջ միասնական դիրքորոշման ձևավորման հարցը և ավելացրել. «Ոչ իշխանական չորս խմբակցությունների դիրքորոշումները բավական մոտ են իրար: Հուսով ենք, որ քվեարկության օրը կունենանք միասնական դիրքորոշում»:
Tert.am-ի հետ զրույցում, ի պատասխան հարցի, թե ինչպես է քվեարկելու քառյակը, որն է այդ միասնական որոշումը, «Բարգավաճ Հայաստան» խմբակցության քարտուղար Նաիրա Զոհրաբյանը հիշեցրեց, որ չունի համապատասխան լիազորություն այդ մասին հայտնելու՝ համաձայն պայմանավորվածության:
«Կարող եմ ասել, որ, կարծում եմ, քառյակը Կառավարության ծրագրի հանդեպ կունենա միասնական որոշում»,- ասաց ԲՀԿ-ական պատգամավորը։ Իսկ հարցին էլ, թե միասնական մոտեցման քանի տարբերակ է մշակվել, ասաց, որ բացի «կողմ»-ից, բոլոր հնարավոր տարբերակները քննարկվել են:
Նշենք, որ համաձայն ԲՀԿ խմբակցության որոշման, վաղը և այսուհետ յուրաքանչյուր քառօրյայից ու արտահերթ նստաշրջանից առաջ, ԲՀԿ խմբակցությունում նիստ կհրավիրվի:
Մեր տեղեկություններով քառյակի համար առավել ընդունելի է չքվեարկելու տարբերակը, այսինքն՝ քառյակը ակտիվ մասնակցում է ծրագրի քննարկմանը, սակայն չի քվեարկում՝ առանց դահլիճից դուրս գալու:
Tert.am-ի հետ զրույցում «Օրինաց երկիր» խմբակցության ղեկավար Հեղինե Բիշարյանն էլ հայտնեց, որ այսօր առավոտյան նիստ են անելու, կարծիք ձևավորելու, որը ձևավորելու է նաև դահլիճում՝ քննարկումներին մասնակցելով:










