Շվեդիայի շրջաններից մեկում ուսուցիչներին կարգելեն տնային առաջադրանք հանձնարարել աշակերտներին
Կենտրոնական Շվեդիայում գտնվող Հալստամմարը թագավորության առաջին շրջանը կդառնա, որտեղ աշակերտներին տնային առաջադրանք չեն հանձնարարի։ Դա հնարավոր կդառնա շրջանային վարչակազմում Ձախ և Սոցիալ-դեմոկրատական աշխատանքային կուսակցության ներկայացուցիչների միջև ձեռք բերված համաձայնության արդյունքում, գրում է ИТАР-ТАСС-ը:
Առաջարկի նախաձեռնողը նախկին ուսուցիչ, այժմ քաղաքական գործիչ Ռիկարդ Անդերսոնն է, ով այսպես է բացատրում իր գաղափարը CBT հեռուստաալիքին տված հարցազրույցում. «Մենք հարցականի տակ ենք դնում տնային աշխատանքների վերաբերյալ ավանդական մոտեցումը: Դրա փոխարեն մենք կցանկանայինք դպրոցներում ստեղծել պայմաններ, որ սովորողները կարողանան կատարել առաջադրանքները տեղում՝ դասարաններում»:
Անդերսոնը չի հերքում անցած դասերը տանը կրկնելու օգուտը: Բայց նա կարծում է, որ տնային առաջադրանքները չպետք է դառնան ծնողների պարտականությունը։
Առաջարկը կյանքի կկոչվի արդեն 2015 թվականի աշնանը։ 2014 թվականի սեպտեմբերին Շվեդիայում քաղաքային և խորհրդարանական ընտրություններ են: «Դա նախընտրական ծրագրի կարևորագույն կետերից մեկն է. բոլորի համար հավասար դպրոցների ստեղծում»,- նշում է Անդերսոնը:










