Ուկրաինան Russia Today-ի լրագրողներին արգելել է լուսաբանել նախագահի ընտրությունները
Ուկրաինան ռուսաստանյան Russia Today լրատվամիջոցի արաբալեզու մասնաճյուղի նկարահանող խմբին արգելել է մուտք գործել Կիև, հայտնում է RT-ն:
Խումբը պատրաստվում էր լուսաբանել մայիսի 25-ին կայանալիք նախագահի ընտրություններն այդ երկրում: Նկարահանող խումբը Կիևից հետ է ուղարկվել Մոսկվա:
RT-ի լրագրողներն ասել են, որ Բորիսպոլի օդանավակայանում իրենց առանձին-առանձին հարցաքննել են: Նրանց հարցրել են նաև, թե ինչ անձնական կարծիք ունեն Ղրիմի հարցով:
Լրագրողների մուտքը մերժվել է այն հիմունքով, որ նրանք չեն կարողացել հավուր պատշաճի բացատրել իրենց այցի նպատակը: Լրագրողները հավատարմագրված են եղել Ուկրաինայի ԿԸՀ-ի կողմից:
Կիրակի օրը մեկ այլ ռուսաստանյան լրատվամիջոցի՝ LifeNews-ի լրագրողները ձերբակալվել էին Արևելյան Ուկրաինայում՝ զենք տեղափոխելու մեղադրանքով:










