Ճապոնիայում ներկայացվել են աշխարհում առաջին Android հեռուստահաղորդավարները (լուսանկարներ, տեսանյութ)

Ճապոնացի մասնագետները մայրաքաղաք Տոկիոյում ներկայացրել են աշխարհում առաջին Android հեռուստահաղորդավարներին, որոնք այնքան բնական տեսք ունեն, որ դրանց դժվար է տարբերել մարդուց։

Ինչպես նշում է The Daily Mail-ը, գերիրական ռոբոտ-հաղորդավարներն իրենց օրինակով ապացուցում են, թե որքան է ռոբոտաշինության ոլորտը զարգացած «Ծագող արևի երկրում»։

Ռոբոտները ստացել են Կոդոմորոիդ ու Օտոնարոիդ անվանումները. դրանք այնքան վարժ են խոսում, որ տպավորություն է ստեղծվում, թե լուրերը հայտնում են սովորական հաղորդավարները։

Աղբյուրը մանրամասնում է, որ հեռակառավարվող ռոբոտներին ստեղծել է Օսակայի համալսարանի գիտական թիմը։ Դրանք կարողանում են շարժել շուրթերը, հոնքերը, գլուխը, ինչպես նաև թարթել աչքերը։

Սիլիկոնե մաշկով ու արհեստական մկաններով ռոբոտներն այսօրվանից կցուցադրվեն Տոկիոյի Զարգացող գիտությունների ու նորարարությունների ազգային թանգարանում։