Ճապոնիա զգուշացի՛ր. տիեզերագնացը լուսանկարել է Ճապոնիան պատուհասած «Նեոգուրի» թայֆունը (լուսանկարներ)

Ճապոնիայի ափերը վերջին մի քանի օրվա ընթացքում պատուհասած «Նեոգուրի» գերթայֆունն այնքան հզոր է, որ ապշելու տպավորություն է թողնում անգամ տիեզերքից նայելու դեպքում։
 

Ինչպես նշում է The Daily Mail-ը, տիեզերագնաց Ալեքսանդր Գերսթը վերևից լուսանկարել է բնական երևույթը՝ ուշագրավ կադրերը ներբեռնելով Twitter սոցկայքում։

«Այն ուղղակի ահռելի է. Ճապոնիա, զգուշացի՛ր։ Երբևէ նման բան չէի տեսել»,- մեկնաբանել է լուսանկարները գերմանացի տիեզերագնացը։ Նա մանրամասնել է, որ լուսանկարներն արվել են հուլիսի 7-8-ը ընկած ժամանակահատվածում։
 

Ճապոնիայի օդերևութաբանական գործակալությունը տեղեկացրել է, որ գերթայֆունը երկրի  որոշ հատվածներում առաջացրել է 200-250 կմ/ժ արագությամբ քամի։ Այժմ այն շարժվում է դեպի Ճապոնիայի հյուսիս։ Նշվում է, որ գերթայֆունի հետևանքով վնասվածքներ է ստացել 28 մարդ, իսկ 63.000 տուն հոսանքազրկվել է։