Սաուդյան Արաբիայում հաղորդավարուհին եթեր է դուրս եկել առանց գլխաշորի (տեսանյութ)
Al Ekhbariya հեռուստաընկերության լուրերի հաղորդավարուհին եթեր է դուրս եկել առանց գլխաշորի՝ դրանով սկանդալ հրահրելով Սաուդյան Արաբիայում, հայտնում է Lenta.ru-ն:
Թագավորությունում սա առաջին դեպքն է, երբ նորությունների հաղորդավարն իրեն նման բան է թույլ տվել, հայտնում է GulfNews-ը:
Եթերից հետո հեռուստաալիքը վրդովված հեռուստադիտողներից բազմաթիվ բողոքներ է ստացել: Սոցիալական ցանցերում շատ օգտատերեր քննադատել են հաղորդավարուհուն՝ ասելով, որ նա խախտել է «շարիաթի օրենքները»:
«Հաղորդավարուհին իրականում նորությունները ներկայացրել է Մեծ Բրիտանիայում գտնվող ստուդիայից: Մենք թույլ չենք տա մեր արժեքների ոտնահարում»,- կատարվածը մեկնաբանել է սաուդյան հեռուստառադիոընկերության մամուլի քարտուղար Սալեհ ալ Մուղալիֆը:
Սաուդյան Արաբիայում կանանց համար խիստ «դրես-կոդ» է սահմանված՝ հասարակության մեջ նրանք պետք է լինեն այնպիսի հագուստով, որը կծածկի իրենց մարմինն ու գլուխը:
Թագավորությունում կանանց նաև արգելված է մեքենա վարել, իսկ նրանց, ում կհամարեն Աստծուն անարգող, հավատն ուրացող, կախարդ կամ ամուսնության մեջ դավաճան՝ կարող են ծեծել ճիպոտներով, կախաղան հանել և նույնիսկ գլխատել: Այս պահելաձևի նորմերին հետևում է այսպես կոչված «բարոյականության ոստիկանությունը»:
Վերջին ժամանակներում սաուդյան հասարակությունը քննարկում է՝ արդյոք կանանց պետք է տալ ավելի շատ իրավունքներ: Թագավոր Աբդալլա իբն Աբդել Ազիզի հրամանով իր խորհրդակցական խմբի կազմում ներառվել է 30 կին:
Մի երկրի համար, որի պետական գաղափարախոսությունը վահաբիզմն է, սա աննախադեպ իրադարձություն է:










