Ռուսաստանում արտասահմանյան համարներով վարորդներին կստիպեն մաքսային փաստաթղթեր ներկայացնել

10:58 • 06.08.14

Ռուսաստանում ճանապարհային երթևեկության կանոններում տեղ գտած փոփոխությունները, որոնք պարտավորեցնում են երկրի տարածքում արտասահմանյան համարներով վարորդներին միշտ իրենց մոտ ունենալ ավտոմեքենայի մաքսային փաստաթղթեր, ուժի մեջ կմտնեն օգոստոսի 12-ից, գրում է gazeta.ru-ն՝ հղում անելով Ռուսաստանի ներքին գործերի նախարարության կայքին:

 

Խոսքը Մաքսային միության մաքսային օրենսդրությամբ նախատեսված փաստաթղթերի մասին է (համապատասխան նշումներով, որոնք հաստատում են ավտոմեքենայի ժամանակավոր ներմուծումը):

 

«2014 թվականի օգոստոսի 12-ից պետավտոտեսչության աշխատակիցների կողմից միջազգային երթևեկությանը մասնակցող տրանսպորտային միջոցների կանգնեցվելու դեպքում դրանց վարորդների մոտ, բացի գրանցման փաստաթղթերից և վարորդական վկայականներից, կստուգվի նաև Մաքսային միության մաքսային օրենսդրությամբ նախատեսված համապատասխան փաստաթղթերի առկայությունը, այդ թվում՝ մաքսային մարմինների հետ համագործակցությամբ»,- ասված է հաղորդագրության մեջ:

 

Նախարարությունը հիշեցրել է, որ արտասահմանցիներն իրավունք ունեն Մաքսային միության տարածք ներմուծել այլ պետություններում գրանցված մեքենաներ անձնական օգտագործման համար և ազատ լինել մաքսատուրքեր վճարելուց մինչև մեկ տարի ժամկետով: